By Mduduzi Mbangayiya
IKaizer Chiefs ibuye nenduku yombangandlala Egypt ngesikhathi ihlulwa yi Zamalek SC ngo-2-1 emdlalweni weCAF Confederation Cup obudlalelwa eSuaz Canal Stadium ngomgqibelo.
Leli qembu lase-Egypt likhombise umdlalo uqala ukuthi liyafuna ukunqoba lidlulele phambili kowomkhumulajezi ngesikhathi lihlasela liphindelele obondeni lasemuva leKaizer Chiefs kodwa lasebenza kahle ukuvimba abagadli beZamalek SC.
Unozinti weKaizer Chiefs uBrendon Peterson wenze umsebenzi oncomekayo ngesiwombe sokuqala salomdlalo evimba amabhola amabi abethunyela ngabadlali beZamalek SC .
Lomdlalo kuyiwe ekhefini zibambene kungekho ebona amapali lapho egxunyekwe khona kodwa ngesiwombe sesibili lomdlalo uqale washuba ngesikhathi iZamalek SC iqhubeka nokuhlasela iphindelela ukugqobhoza ubonda lasemuva leKaizer Chiefs ngempela ligcine luvumile ngesikhathi Ahmed Sayed Zizi engqofela phakathi ibhola ebeligotshwe ophondweni losobunxele ladlula kuGavin Msimangu obeyikhonco elivuzayo emuva walicosha enethini uPetersen.
Iqhubekile iZamalek SC nokuphungwa ngezithebe yiKaizer Chiefs ngesikhathi abadlali basemuva bexhamazela kwangena igoli ngomzuzu ka-72 lishaywa ngu-Abdallah El Said odedele inguzunga yeshodi esebhokisini lamshiya emile uBrendon Petersen .
Ngemuva kwalapho iKaizer Chiefs iqalile yaphuma emuva lapho kade ihlezi khona yahlasela yathola ikhona yathathwa nguLebohang Maboe wayikopelisa ebhokisini yahlangana nekhanda likaGlodly Lilepo yabhajwa enethini.
IKaizer Chiefs ihlasele udu kodwa lutho ukuthola igoli lokulinganisa kwaze kwaphela umdlalo njengoba iZamalek SC ibisivimbe emuva.
IKaizer Chiefs igcine ngokuthi iliwashe ijezi ngoba inamaphuzu angu 10 ilingana ne Al Masry SC kodwa umehluko ngamagoli phakathi kwalamaqembu nokwenza ukuthi Al Masary SC idlulele phambili neZamalek SC eqede ihlezi phezulu ngamaphuzu angu 11 .
