Isihlabani sakuthelevishini, uSiyacela Dlamuka, ushiye abantu bakuleli beshaqekile kulandela inkulumo yakhe yokuzimisela ngokusebenzisa imithi emibi nokubulala umfowabo ukuze afeze iphupho lakhe lokuba nesithembi.
Esiqeshini sakamuva sohlelo i-Isencane Lengane, olukhonjiswa kuthelevishi esiteshini i-Moja Love ngeSonto ebusuku, ngomhlaka-4 October 2026, uSiyacela uveze ngokusobala isifiso sakhe sokuba yindoda enesithembu.
Lokhu kudale inkulumompikiswano ezinkundleni zokuxhumana, njengoba ethe uzosebenzisa “ukuthwala” ukuze abe nengcebo, ezokwazi ukuba nemali edingekayo yokondla abafazi abangaphezu koyedwa.
Abantu bakuleli bathanda kakhulu lezi zithandani ngesikhathi zishada zisencane kakhulu ngonyaka ka-2019; lapho uThando wayeneminyaka engu-15 ubudala kanti uSiyacela yena eneminyaka engu-16 ubudala.
USiyacela uthe uyazi ukuthi ukuthwala kudinga imihlatshelo emikhulu, okuhlanganisa nokubulala izihlobo, kodwa uzimisele ukukwenza lokho.
“Ngizoqinisekisa ukuthi ngiphila impilo enhle. Ungamthatha kanjani umfazi wesibili uma wesaba ukuyolanda inyoka?”
USiyacela uthe uhlela ukuvakashela izindawo lapho kwenziwa khona ukuthwala ukuze afunde ngalokho okudingekayo. Uthe akanankinga ngokwenza yonke leyo mihlatshelo ngoba akasenawo unembeza. Uthe impilo iba lula uma ungenawo unembeza ngoba awusabi lutho.
“Angisenawo unembeza. Ngisho noma ngingatshelwa ukuthi ngibulale umfowethu, ngingakwenza lokho ngoba ngiyayidinga imali.”
Umfowabo kaSiyacela, uNqobani Dlamuka, uthe kumphatha kabi ukuzwa ukuthi umfowabo ucabanga ngokuthwala.
UNqobani uphinde wathi ukholwa wukuthi labo abakwenzayo banesikhathi esifushane sokuphila.
“Ngikholelwa emadlozini ami kuphela. Ngisho noma ngingenayo imali, ngikhetha lokho kunokuthwala,” kusho uNqobani.
Discover more from IBUNDA NEWS
Subscribe to get the latest posts sent to your email.
