IMamelodi Sundowns iqophe umlando ngokuba yiqembu lokuqala laseNingizimu Afrika eliwine indebe yeCaf Champios League kabili. ISundowns yehlule i-AS FAR yaseMorocco ngo 2-1 kowamanqamu uma sekuhlanganiswa imiphumela yemilenze yomibili.
Emlenzweni wokuqala, Amasandawana anqobe ngo 1-0 ePitoli. NgeSonto ebusuku, ePrince Moulay Abdellah Stadium, eMorocco, zibambane ngo 1-1. Igoli leqembu lasekhaya kube yiphenathi eshaywe ngukaputeni, uMohamed Rabie Hrimat esiwombeni sokuqala.
Ngaphambi kokuthi ziye ekhefini, uTeboho Mokoena ushayele iSundowns elokulinganisa. Ngokuwina iChampions League, iSundowns isiyiqembu lokuqala eMzansi eliwine lo mqhudelwano omkhulu e-Afrika amahlandla amabili.
Yayiqukula okokuqala ngo-2016 isaqeqeshwa nguPitso Mosimane. Iqembu lokuqala laseMzansi elawina iChampions League yi-Orlando Pirates elabuya nayo ngo-1995. Ngesizini edlule, iSundowns ikhale ngaphansi kowamanqamu kwiPyramids yase-Egypt.
“Le ndebe isifanele, kade sizama ukungqongqoza iminyaka eyisithupha. Ekugcineni umnyango uvulekile. Ngibonga emndenini wakwaMotsepe, ithimba labaqeqeshi nakubalandeli ngokuqinisa isandla kithina. Siyazi ukuthi siyinsika yebhola laseMzansi,”kusho unozinti weSundowns, uRonwen Williams.
Enkundleni, i-AS FAR iqale ngegiya eliphezulu ikhombisa ukuthi ifuna ukuthola igoli lokulinganisa ngokushesha kodwa iSundowns ibingafuni lutho emuva. Kugcine kuyilungele ngomzuzu ka-40 ngesikhathi ithola iphenathi kulandela ukudlaliswa kabi ebhokisini komdlali wayo nguDevine Lunga.
Nokho, iSundowns iphendulile ngesikhathi esengezwe ngunompempe ngegoli elishaywe nguMokoena.Esiwombeni sesibili. i-AS FAR iqhubekile nokuhlasela ngenhloso yokuthola amagoli amabili ebikade isiwadinga ukuze izonqoba. Nakuba kunjalo kodwa akukho ekutheni obekukhathaza uWilliams ezintini zeSundowns.
I-AS FAR ithole enye iphenathi ngomzuzu ka-74 ngesikhathi uWilliams ewisa umdlali wayo ebhokisini. Kubuye yena uHrimat kodwa wayivimba uWilliams.IMamelodi Sundowns izodlala emqudalwaneni emithathu njengamanje nokwi CAF Super Cup , Intercontinental Cup , Club World Cup .
Discover more from IBUNDA NEWS
Subscribe to get the latest posts sent to your email.
