Kuphangalale abantu abangu-9 kuphahlazeka ibhanoyi

Kuphahlazeke ibhanoyi phakathi nemizi endaweni yaseFlorida, kwashona abantu abayisishiyagalolunye abebephakathi ebhanoyini ngeSonto, kusho unobhala wezokuthutha wase-US.

Le ngozi yenzeke eduze kwaseCresthaven, cishe amakhilomitha angu-14 (14 km) ukusuka eMar-a-Lago, okuyindawo yokuphumula kaMengameli uDonald Trump, endaweni yabadla izambane likapondo, ePalm Beach County, cishe ngo-12:50 EST (17:50 GMT).

Izithombe ezithathwe ngemuva kwengozi zikhombisa umgodi omkhulu ophakathi nomgwaqo wendawo yomphakathi, kanti kusanezindawo ezisavutha umlilo kanye nezingcezu zikakhonkolo nezinsalela zebhanoyi lohlobo lwe-Learjet 60 ezisakazeke yonke indawo.

I-Federal Aviation Administration (FAA) esitatimendeni sayo ithe, leli bhanoyi belisuka e-Austin, eTexas, libheke eBahamas.

Imibiko yabezindaba zase-US kanye nokuhlaziywa kohambo lwebhanoyi kukhombisa ukuthi ibhanoyi lalihamba phansi ngesivinini esikhulu, isivinini esingamakhulu ngomzuzwana ngaphambi kokuba liphahlazeke.

Ngokombiko we-CBS News, umlingani we-BBC e-US, ekuqoshweni kwezingxoxo phakathi kwabashayeli bebhanoyi nabalawuli balo ngaphambi kokwenzeka kwengozi, umshayeli webhanoyi uzwakala ethi indiza yehla ngesivinini esingamamitha ayizinkulungwane eziyishumi ngomzuzu.

Umshayeli wabe esememezela isimo esiphuthumayo, ememeza ethi: “Sihamba ngesivinini esiphezulu kakhulu futhi sehla ngesivinini esingamamitha ayizinkulungwane ezingu-20 ngomzuzu,” kubika i-CBS.

“Sizophahlazeka… Asisenaso isikhathi,” kusho umshayeli etshela abalawuli bamabhanoyi.

IZITHOMBE: