Uyavela enkantolo ‘ochaphe ngenhlamba’ uMkhwanazi ku-TikTok

Kulindeleke ukuba avele eNkantolo yeMantshi yaseThekwini namuhla, 2 November 2026 indoda esolwa ngecala lokuthuka inhlamba (crimen injuria) kanye nokugqugquzela udlame

Le ndoda iboshwe ngeSonto, lomhlaka-1 November 2026.

Kubikwa ukuthi umsolwa ufake i-video ku-akhawunti yakhe yasezinkundleni zokuxhumana i-TikTok lapho ehlambalaza khona uKhomishana wamaPhoyisa wesiFundazwe saKwaZulu-Natal, uLieutenant General Nhlanhla Mkhwanazi, egqugquzela nabantu ukuthi benze udlame.

Ngemuva kokuqaphela ukuthi amazwi alo msolwa oneminyaka engu-38 ubudala awassho ku-TikTok agcwele izici zobugebengu bokuhlambalaza kanye nokugqugquzela udlame, ithimba lophiko lwamaphoyisa iKwaZulu-Natal Provincial Task Team livule icala ukuze liphenywe.

Lo msolwa ulandelwe waze watholakala ePrincess Magogo Stadium, KwaMashu, lapho aboshwe khona.