I-EFF KwaZulu-Natal igxeka ukubulawa kwamalungu e-ANC eMgababa

I-Economic Freedom Fighters (EFF) KwaZulu-Natal ikugxeka kakhulu ukubulawa ngonya kwamalungu amabili e-African National Congress (ANC), okubikwa ukuthi adutshulwe abantu abangaziwa ngesikhathi ekhankasa, engena umuzi nomuzi eMgababa ngoLwesine ntambama.

Lesi senzo sobudlova esinonya siwukuhlasela impilo yomuntu kanye nelungelo lentando yeningi lamaqembu ezombusazwe lokwenza imikhankaso ngokukhululeka, nokuxhumana nemiphakathi ngaphandle kokwesaba ukwesatshiswa noma ukulimala.

Izenzo ezinjalo kumele zinqandwe zisaqala zingaze zande zibe yisimo sobudlova bezombusazwe nesisongela ukuphepha kwemiphakathi kanye nobuqotho bohlelo lokhetho.

I-EFF icela izinhlaka zomthetho ukuba zenze uphenyo olunzulu ngalesi sigameko futhi zibambe labo abanesandla kuso. Abenzi bokubi kumele babhekane nengalo yomthetho ngokugcwele.

I-Code of Conduct ye-IEC iqinisekisa ilungelo lamaqembu ezombusazwe lokufuna ukwesekwa, ukubamba imihlangano yomphakathi, kanye nokuhamba ukuya kuleyo mihlangano nokuyihambela. Le nkululeko yentando yeningi kumele ivikelwe, futhi wonke amaqembu ezombusazwe anesibopho sokugxeka ubudlova nokugcina ukusebenzisana kwezombusazwe ngokuthula.