Ubuyela enkantolo uShadrack Sibiya

Isicelo sebheyili esesithathe isikhathi eside sowayenguKhomishana wamaPhoyisa kaZwelonke, uShadrack Sibiya, kulindeleke ukuthi siqhubeke namuhla.

NgoLwesibili, iNkantolo yeMantshi yaseRandburg eGoli ilalele izinsolo ezibhekiswe kulo wesilisa oneminyaka engu-59 ubudala, ezimyamanisa nemisebenzini engekho emthethweni kanye nobudlelwano obuseduze nezigebengu.

USibiya owaboshwa ngenyanga edlule eSandton, ubhekene namacala, okuhlanganisa nokukhuthaza ngokocansi kwentombazane eneminyaka engu-16 ubudala, ukudlwengula, ukushushumbisa abantu kanye nokwephulwa komthetho wezibhamu i-Firearms Control  Act.

Lezi zinsolo zenziwe ngesikhathi sengxoxo eqoshiwe eyimizuzu engu-25, nokuyingxoxo ephakathi kommangali, ‘uMr. M’ – onguyise wentombazane eneminyaka engu-16 ubudala kanye nosomabhizinisi uSerge Cabonge.

USergei Ndlovu ongumseshi utshele inkantolo ukuthi ingxoxo eqoshiwe yayinokuqukethwe kwesitatimende esifungelwe esahlinzekwa nguSizakele Dlamini, ongunkosikazi kaSibiya.