Kube yimpumelelo ukuhlinzwa kukaPope Leo ephashini

UPope Leo XIV uhlinzwe esifubeni eGemelli Hospital ngoLwesibili ntambama, njengoba bekuhleliwe, ngokusho kwesitatimende esikhishwe yi-Holy See Press Office egameni likaDkt. Luigi Carbone noSolwazi Stefano Margaritora.

Ngesikhathi sokuhlinzwa, odokotela basuse ingxenye engezansi yephaphu likaPope esandleni sokudla besebenzisa indlela yobuchwepheshe besimanje-manje  ukuqinisekisa ukuthi izicubu ezithintekile zisuswa ngokuphelele.

Odokotela baqinisekise ukuthi kutholakale uhlobo lomdlavuza wamaphaphu olubizwa nge-lung adenocarcinoma, ngesikhathi kuhlolwa izicubu nobekwakusolwa ukuthi kukhona ngemuva kokuhlolwa kwangaphambilini kwezokwelapha.

UPope uchithe cishe amahora amathathu egumbini lokuhlinzwa, kanti inqubo ngokwayo ithatha cishe imizuzu engu-90. Ngokusho kwethimba lezokwelapha, ukuhlinzwa kube yimpumelele futhi akukho zinkinga.

Ngemuva kokuhlinzwa, uPope Leo wavuka ngendlela ejwayelekile wabuyiselwa ekamelweni lakhe esitezi seshumi esibhedlela ngemuva kwesikhathi esifushane sokubhekwa isimo sakhe.

Ukuhlolwa okwengeziwe kuzokwenziwa ezicutshini ezisusiwe ezinsukwini ezizayo njengengxenye yokunakekelwa kwakhe ngemuva kokuhlinzwa.

I-Holy See iphinde yaqinisekisa ukuthi azikho izinguquko esikhathini sokulaliswa esibhedlela esimenyezelwe ngaphambilini esingaba yisonto elilodwa.