ISilo uMisuzulu kaZwelithini izosingatha uMkhosi weminyaka yonke we-Bayede Diwali we-11 (11th Annual Bayede Diwali Festival), eSigodlweni saseMashobeni oPongola nokuwuMkhosi ozoba ngowokuqala ewusingatha kusukela enyukela esihlalweni sobukhosi.
Lo mkhosi, ohlelwe ngokubambisana ne-Sivananda World Peace Foundation kanye neNxusa loMbuso lezokuBumbana koMphakathi nokuThuthukiswa koMnotho, uMntwana u-Ishwar Ramlutchman Mabheka Zulu, uzoba ngoLwesihlanu, womhlaka-23 October 2026.
Lo mcimbi uqhubeka nobuqhawe beSilo esesakhothama uGoodwill Zwelithini kaBhekuzulu, owayewusekela lo mkhosi njengenkundla yokuqinisa ubudlelwano phakathi kwemiphakathi yamaZulu namaNdiya kanye nokugqugquzela ukuthula nokubumbana komphakathi.
Sekuphele iminyaka engaphezu kweyishumi uMkhosi we-Bayede Diwali uhlanganisa amalungu emiphakathi ehlukene, abaholi bendabuko, izikhulu kanye nabantu abavela kulo lonke elakwaZulu-Natal ukuze kugujwe ukwehlukahlukana kwamasiko kanye nokuhlalisana ngokuthula.
Umkhosi walo nyaka uzoba nomculo, umdanso kanye nemfashini ebonisa amasiko ahlukene, kanti uhlelo luzophetha ngombukiso wokuqhunyiswa kokhilikithi (Fireworks) esigodlweni sobukhosi.
I-Sivananda World Peace Foundation, ngokubambisana neNdlu yaseBukhosini kanye noMntwana u-Ishwar, izodlala indima ebalulekile ekuhlanganiseni imiphakathi kulo mcimbi.
Inhloso yalo mcimbi ukuqinisa amaxhama okuxhumana, ukusebenza ngokubambisana nobudlelwano obuhle phakathi kwezinhlanga ezehlukene kuleli.
Isithombe:
Discover more from IBUNDA NEWS
Subscribe to get the latest posts sent to your email.
