Ukhala ngezinkinga zaseKenya ngaphambi komdlalo neBafana uMcCarthy

Umqeqeshi omkhulu weqembu lesizwe laseKenya, uBenni McCarthy, ukhulume ngalezo zinkinga ababhekene nazo njengamanje ngaphambi kwemidlalo ebalulekile yokuhlungela i-AFCON ka-2027 abazoyidlala ngokulandelana neBafana Bafana eqeqeshwa uPitso Mosimane. IKenya ingelinye lamazwe amathathu azosingatha i-AFCON ka-2027 kanye neTanzania ne-Uganda. Ama-Harambee Stars akwiQembu D kanye neBafana, iGuinea ne-Eritrea kodwa asevele eqinisekise indawo yawo emqhudelwaneni njengoba engamanye amazwe asingatha umqhudelwano.

Ngemuva kwemidlalo emibili, iqembu likaMcCarthy lisendaweni yesithathu lineliphuzu elilodwa ngemuva kokudlala ngokulingana ngo 1-1 ne-Eritrea nokuhlulwa ngo 2-1 yiGuinea emdlalweni abawudlale kude nekhaya. UMcCarthy nethimba lakhe babhekene nezinkinga eziningi ezingaphandle kwenkundla ezithinte kakhulu amalungiselelo abo e-AFCON.

IKenya izobhekana neNingizimu Afrika emidlalweni emibili elandelanayo, okulindeleke ukuthi ibe nemidlalo eshubile njengoba womabili la mazwe eholwa ngabaqeqeshi baseNingizimu Afrika. UMcCarthy usekhulume ngalezo zinkinga ababhekene nazo eKenya, okuhlanganisa neligi yasekhaya engakaqali ukudlalwa.

“Uyazi, kodwa uma abantu belindele ukuthi nginqobe iBafana, nginqobe iMorocco, nginqobe iSenegal, kunzima kakhulu; kuwumsebenzi ongenakwenzeka ngenxa yabadlali abanabo lawo mazwe kanye namaligi abawadlala kuwo uma kuqhathaniswa nabadlali esinabo eKenya,” kusho uMcCarthy etshela abezindaba.

“Akubona bonke abadlali abadlala eYurophu, ngakho abadlali bethu abaningi bavela kumaligi asekhaya eKenya. Futhi ukuze wazi, abantu bafuna ukubona abadlali baseKenya, kodwa iligi ayikaqali nokuqala. Ngakho-ke, akekho noyedwa umdlali waseKenya oke wadlala umdlalo owodwa weligi.

“Manje ukhetha kanjani abadlali abangakaze badlale, kanti emhlabeni wonke eminye imiqhudelwano isivele iqalile? Ngakho-ke, ngicabanga ukuthi kulula ukukhuluma uma ubuka nje ngaphandle.” “Wonke umuntu ongaphandle uzibona engumqeqeshi ongcono kakhulu noma engumdlali ongcono kakhulu. Kodwa uma uthola ithuba lokuba ngakuleli cala, ubona ukuthi kunzima kangakanani.”