Ngu: Alfred Ngubane |
I-Stellenbosh FC sizobe siphethe isikhiye embangweni wesicoco seBetway Premiership uma isibhekene ne-Orlando Pirates ngoLwesibili ebusuku e-Athlone Stadium ngo 19-30. IPirates isele ngamaphuzu amahlanu eqenjini elivikela isicoco, iMamelodi Sundowns, abafana besitayela asebedlale imidlalo engu 27 banamaphuzu angu 64 kanti eZimnyama ngenkani zilandela ngamaphuzu angu 59 emdlalweni engu 26.
Maphakathi nesonto eledlule IStellenbosh FC ibamba iSundowns ngo 1-1 ePitoli. Kungenzeka aphenduke amatafula uma umphumela ungavuna iSundowns ngoLwesithathu uma isibhekene neKaizer Chiefs. IRichards Bay FC isanda kuwaphazamisa womabili la maqembu alwela isicoco njengoba idlale ngokulingana ngo 2-2 nePirates, yabambana ngo 0-0 neSundowns.
Akulula ukuqagela imiphumela yemidlalo phakathi kweStellies nePirates kwazise eyakamuva ikhiqize imiphumela engafani.Ngesizini edlule, iStellenbosch yashaya iPirates ngo 1-0 emdlalweni weligi e-Orlando, kwathi sekudlalelwa eKapa umdlalo waphela zibambene ngo 0-0.Baphinde bahlangana kowamanqamu weMTN8 iPirates eyawunqoba ngo 3-1 eThekwini.
Kule sizini, eZimnyama ziguqise iStellies ngo1-0 emdlalweni weligi e-Orlando ngo-Agasti nyakenye ngegoli likaKamogelo Sebelebele. Sezidibana kowamanqamu weMTN8 ePolokwane ngoSepthemba, iPirates yanqoba khona ngo 3-0. Kulowo mdlalo uTshepang Moremi wahlohla amagoli amabili, elilodwa lashaywa nguTshegofatso Mabasa.
Udaba lukaMabasa lungenye yezinto ezenza ubhekwe ngabomvu umdlalo wangoLwesithathu njengoba lo mgadli ebolekiswe yiPirates kwiStellies ngoJanuwari nonyaka.Selokhu efike eqenjini likaGavin Hunt useshaye amagoli amane.
Discover more from IBUNDA NEWS
Subscribe to get the latest posts sent to your email.
