UsanguMeya waseMvoti uMavundla ngokwamaphepha asenkantolo

Umnyango wezokubusa nokumbambisana nobuholi bomdabu KwaZulu-Natal oholwa nguBongiwe Sithole Mooi uthumele isithunywa salomnyango ukuba sihlalise umhlangano wokukhipha uPhilani Mavundla oyiMeya yase Mvoti ngevoti lokungabuthembi ubuholi bakhe. Isithunywa siwuhlalisile umhlangano wokukhipha uPhilani Mavundla no Mfundo Masondo ongusomlomo.

Ukhansela uZondi oyilungu eliphezulu esigugwini se IFP ngaphansi kamasipala uMvoti uphakamise uNtombi Ngubane esikhundleni sokuba ngusomlomo. UNgubane obengusekela Sodolobha wase Mvoti wesulile wamukela isikhundla esisha aqokelwe sona sokuba ngusomlomo. Baphinde baphakamisa esikhundleni sobu Meya uGabriel Malembe.

Ngokuthola ngomthombo obukhona kwenzeka lentimbothi yomshado we IFP ne ANC. Kuthe mangabe kuphela umhlangano wokugcotshwa kobuholi obusha, isikhonzi senkantolo sitheleke ngaphakathi ezindlini zikamasipala wase Mvoti kwacisha ukukhanya kokusa kwasala ukukhanya obuphakade.

Njengoba kuphenduke idina laba yibhulakufesi, isithunywa somnyango wezokubusa nokumbambisana nobuholi bomdabu siqale sangenwa ngamakhaza emini ilanga likhipha umkhovu etsheni.

Sabonakala sisula ngedukwe lamabhinca ebusweni kwabonakala ukuthi indaba inkulu, kuqale kwaxega amadolo mangabe esukuma phansi, kwaphela nasozwaneni ngoba ubesethi uphumelele ukuhlula umthetho wenkantolo obuvimbela ukuthi lomhlangano ungahlali.

Loludaba lusezithebeni zenkantolo enkulu yase Mgungundlovu luzohlalelwa ngomhlaka 4 enyangeni ka Ncwaba ngokwamaphepha abhalwe phansi yi nkantolo. Isikhonzi senkantolo sikhiphe amaphepha sasayinisa isithunywa soMnyango wezokubusa nokumbambisana nobuholi bomdabu ukuthi siwatholile.

“Isithunywa soMnyango siphule umthetho wokuhlalisa umhlangano ngenxa yesivimbelo ngoba uMnyango wezokubusa nokumbambisana nobuholi bomdabu KwaZulu-Natal wawathola amaphepha athunyelwa yinkantolo, kodwa bona kade bewaphika” ngokusho komthombo.

Khona manjalo umholi weqembu le IFP uMnuzane Velenkosini Hlabisa nesigungu esiphezulu siwuchithile lomshado ngoba bewungagunyaziwe yiqembu le IFP. UHlabisa uphinde wanxusa uMnuzane Gabriel Malembe ukuthi makehle esikhundleni sokuba nguMeya kodwa wanganaba kakhulu ukuthi ngabe ubuholi be IFP eMvoti buzothathelwa yini izinyathelo zokuqondiswa ngaphakathi. Iqembu le ABC lilinde umenenja kamasipala wase Mvoti ukuthi ahlahle indlela.