Ufikelwe umunyu owayenguNobhala-Jikele we-MKP

USibonelo Nomvalo ukhale mi izinyembezi ngesikhathi ekhuluma ngobunzima bokuxoshwa kwakhe esikhundleni sikaNobhala-Jikelele weqembu i-uMkhonto weSizwe.

UNomvalo uthe isonto eledlule belinzima kakhulu kuye kanye nasemndenini wakhe.

Namuhla, uSibonelo Nomvalo ukhuluma obala okokuqala ngqa selokhu axoshwa esikhundleni sikaNobhala-Jikelele weqembu i-uMkhonto weSizwe.

“Ngimi lapha hhayi ngoba ngilwela ukubuyiselwa esikhundleni sami njengoNobhala-Jikelele weqembu i-uMkhonto weSizwe. Ngifuna ukwenza izinto ezimbili kuphela: ukuvikela isithunzi sami—engasisebenzela ngemfundo yami—kanye nokwazisa amalungu eqembu i-MK ngalokho okwenzekayo eqenjini lawo, njengoba nganqatshelwe ithuba lokwenza lokho ngaphakathi eqenjini, futhi ngaphucwa nethuba lokwenza ukudluliselwa okusemthethweni kwezikhundla.”