URamaphosa uthi basaludlela amathambo engqondo udaba lokukhuphuka kukaphethiloli

UMengameli wakuleli, uCyril Ramaphosa uthi uhulumeni ucabanga ngezinyathelo ezengeziwe zokunciphisa umthwalo wokwenyuka kwentengo kaphethiloli kodwa uxwayise ngokuthi ukungenelela kuchaza ukuthatha imali kwezinye izinhlelo zikahulumeni.

Ekhuluma nezintatheli eceleni kwiNgqungquthela ye-Bana Pele ECD eSandton ngoMsombuluko, uRamaphosa uthe ukwenyuka kwentengo kaphethiloli kuyinkinga yomhlaba wonke futhi uhulumeni ubheka izindlela angangeneela ngazo njengoba abantu baseNingizimu Afrika bebhekene nezindleko zokuphila ezikhulayo.

“Udaba lwentengo kaphethiloli luyinkinga emhlabeni jikelele. Asilona lodwa izwe elithintekayo ekwenyukeni kwentengo kaphethiloli futhi vele kunezimpendulo ezahlukahlukene ezivela ezinhlanganweni ezahlukene kanye nohulumeni  namabhizinisi futhi sikudlela amathambo engqondo ukuthi yini okudingeka yenziwe,” esho.

URamaphosa uthe uhulumeni wake wangenelela ngaphambilini lapho intengo kaphethiloli ikhuphuka, wasebenzisa cishe imali engu-R24 billion ohlelweni loxhaso.

Lokhu kuza njengoba abashayeli bezimoto bebhekene namanani kaphethiloli aqopha umlando kulandela ukwenyuka okuqale ukusebenza ngomhlaka-7 October 2026.

Uphethiloli i-95-octane ukhuphuke ngo-R3.33 ilitha wafinyelela ku-R30.25, kanti uphethiloli i-93-octane ukhuphuke ngo-R3.12 wafinyelela ku-R29.88. Amanani kadizili nawo akhuphuke kakhulu.

Ukwenyuka kwenzeke ngemuva kokuthi ukwehliswa kwesikhashana kwentela kaphethiloli okuqalwe phakathi kuka-April noJune kwaphela.

Ukwehliswa kwentela kaphethiloli kwanciphisa intela kaphethiloli ngo-R3 ilitha kuphethiloli kanye no-R3.93 ilitha kudizili ngesikhathi sokukhuphuka kwawo.