Amaphoyisa aKwaZulu-Natal asebikelwe ngemiqhafazo ezungeza enkundleni yezokuxhumana i-WhatsApp ethi inikeza amathuba omsebenzi ophikwni lwamaphoyisa i-South African Police Service (SAPS) ngenkokhelo engu-R15 000.
Isithombe esisetshenziswe njenge-profile ku-WhatsApp kula mathuba omsebenzi mbumbulu ngesePhini likaKhomishana wesiFundazwe KwaZulu-Natal obhekele ezokuPhathwa kweZinsizakalo (Deputy Provincial Commissioner for Corporate Services), uMajor General (uDkt) SB Ngcobo.
Indlela esetshenziswa yilezi zizigilamkhuba ukuthumela imiqhafazo ka-WhatsApp kubantu abangazi lutho, bebathembisa umsebenzi emaphoyiseni akuleli.
Lezi zigebengu zisheshe zithumele ifomu lesicelo somsebenzi kumuntu okuhloswe ukuba abe yisisulu sazo. Zifuna u-R15 000 ngaleli thuba lomsebenzi.
Izisulu ziyalelwa ukuthi zikhokhe idiphozithi engu-R7 500, kanti imali esele izokhokhwa uma sekusayinwa amaphepha omsebenzi.
Umphakathi uyaxwayiswa ukuba uyiqaphele imiqhafazo enjalo eqhamuka ngo-WhatsApp uphinde ubike ngayo esiteshini samaphoyisa esiseduze. Imisebenzi yasemaphoyiseni akuleli ayithengiswa. Akukho muntu okufanele acelwe ukuthi akhokhe ukuze athole umsebenzi emaphoyiseni; noma ubani owenza lokho wenza ubugebengu.
Discover more from IBUNDA NEWS
Subscribe to get the latest posts sent to your email.
