UNgqongqoshe wezeMpilo KwaZulu-Natali uNomagugu Simelane unxuse abazali, abanakekeli kanye nemiphakathi ukuba baqinisekise ukuthi izingane zigonywe ngokuphelele, wacela abesifazane ukuthi bakubeke eqhulwini ukuhlolelwa umdlavuza wesibeletho kanye nowebele.
USimelane ubekhuluma ngesikhathi sohlelo loMnyango wezeMpilo lokufinyelela kubantu lwe-Isibhedlela Kubantu eSithambi Sportsfield ePhongolo, eZululand District, ngoLwesibili, lapho izinsizakalo zezempilo ezahlukahlukene zisondezwe emiphakathini.
UNgqongqoshe uveze ukukhathazeka ngokwehla kokugonywa kwezingane esifundazweni, exwayisa ngokuthi ukungagonywa kwezingane kuzishiya engcuphensi yokuthola izifo.
“Sikhathazeke kakhulu ngokwehla kwezinga lokugonywa kwezingane. Wonke umntwana ophuthwa ukugonywa usengozini enkulu yokugula kakhulu, kanti futhi ukuphuthwa umgomo kudala amathuba amaningi okuthi izifo ezingavinjelwa zisabalale emindenini, ezikoleni nasemiphakathini,” kusho uSimelane.
UMnyango uhlose okungenani ukugoma okungu-90% futhi unxusa abazali, abanakekeli, abasebenzi bezempilo, abaholi bendabuko nabenkolo, othisha kanye nezinhlaka zomphakathi ukuba basebenzisane ukuze bafeze lo mgomo.
USimelane uthe ulwazi olungelona iqiniso kanye nezinselele ezingokoqobo, okuhlanganisa ubunzima bezokuthutha, ubumpofu, amabanga amade kanye nemisebenzi yasekhaya, kunegalelo ekutheni izingane ziphuthwe imijovo yemigomo.
IZITHOMBE:
Discover more from IBUNDA NEWS
Subscribe to get the latest posts sent to your email.
