Ungqongqoshe uzwakalise ukuzwelana nabashelwe yindawo yokuhlala

UNgqongqoshe wezokuBusa ngokuBambisana nezoMdabu KwaZulu-Natali, uMfundisi Thulasizwe Buthelezi uzwakalise ukuzwelana okukhulu kanye nokweseka imindeni ethinteke esigamekweni sokusha kwemijondolo yaseZoo, engaphansi koMasipala weNdawo waseMngeni, ngeSonto ekuseni.

Kubikwa ukuthi ilangabi lingqongise le mijondolo cishe ngezithuba zabo-03:00 ekuseni, lacekela phansi elinganiselwe kwengu-40 isibalo, kwasala dengwane iqwaba yezakhamuzi.

Ayikho imibiko yokudlula emhlabeni kwabantu kanjalo neyabalimele kulesi sigameko.

UNgqongqoshe ushayele ihlombe ukusebenza ngokushesha nangokubambisana phakathi komphakathi nethimba elibhekelele izinhlekelele kamasipala, ephawula ukuthi ukubambisana okunjalo kubalulekile ekunciphiseni umthelela wezinhlekelele ezingalindelekile emiphakathini esengozini.

Izikhulu zokuphathwa kwezinhlekelele zakwa-Cooperative Governance and Traditional Affairs (Cogta) zizoqhubeka nokuqapha isimo zisebenzisana noMasipala weNdawo waseMngeni.