Ngu: Alfred Ngubane |
UMQEQESHI we-Orlando Pirates, u-Abdeslam Ouaddou, uyikhombe eMbombela Stadium imibhiyozo kulandela ukubajwa kwezakhe yiDurban City emdlalweni obekufanele bawunqobe ukuze bezoqukula isicoco seBetway Premiership phambi kwezinkumbi zabalandeli e-Orlando Amstel Arena, eSoweto, ngoMgqibelo ntambama.IPirates iphume nephuzu emdlalweni ophele ngo 0-0 obekubhekwe ukuthi izoqoqa kuwona amathathu, ilingane neMamelodi Sundowns esesicongweni se-log yePremiership ngamaphuzu angu-68.
EZimnyama zisendaweni yesibili ngawu-66.Emdlalweni wokugcina wesizini, zizobhekana ne-Orbit College, evika izembe, eMbombela Stadium, eMpumalanga, ngoMgqibelo ngo-3 ntambama. Lo mdlalo usushintshe kwaba yiwona ophethe injabulo nezinyembezi zabalandeli bePirates abagcina ukubona iqembu labo liqukula isicoco seligi ngo-2012.
Umdlalo ne-Orbit bekubhekwe ukuthi uzoba ngowokuyojabula nokunika abanye abadlali ithuba lokuzibonakalisa.Emuva komdlalo, u-Ouaddou, uthe uyakholwa ukuthi nakanjani bazowuqedela eMbombela umsebenzi ngempelasonto ezayo.
“Ekuqaleni kwesizini ngasho ukuthi umbango weligi uzoqhubeka kuze kube wusuku lokugcina. Angikhathazekile kodwa ngijabhile ngoba asiwinanga. Kodwa masiyeni emdlalweni wokugcina siyoqukula indebe. Sekuphele iminyaka eminingi iPirates ingayiwini iligi futhi lokho kubonakele ngamatata enkundleni. Kubafana bami ngifuna ukuthi hambani niyothatha isicoco ngempelasonto ezayo,”kusho u-Ouaddou kwiSupersport.
Enkundleni, iPirates ifake ingcindezi kusukela ekuqaleni komdlalo kodwa ukuqina kodonga lwasemuva lweCity lwenze abagadli beZimnyama bathwala kanzima.
Discover more from IBUNDA NEWS
Subscribe to get the latest posts sent to your email.
