Ngu: Alfred Ngubane |
Inkosi yesizwe samaBhaca ishiye phansi izifundo zayo eNyuvesi ngenxa yombango wesihlalo oshosaphansi eMzimkhulu.Inkosi uNtokozo Msingaphansi ukhala ngokuthi iphoqeleke ukuba ishiyephansi e-UKZN ngoba isabela isimo sempilo yayo esisengcupheni.
UMsingaphansi ubanga isihlalo neNkosi uXolani Zulu ogcotshwe ngoZibandlela emcimbini owawuhanjelwe abantwana baseNdlunkulu kaZulu nowawusingethwe uNgqongqoshe wezokuBusa nokuBambisana neziNdaba zoMdabu , uMfundisi uThulasizwe Buthelezi.
Ngokwemibiko ephume ephephandabeni lansukuzonke lesiZulu, Inkosi uMsingaphansi ikhala ngokuphucwa isihlalo sayo nesola uButhelezi.Ithi isihlalo sayo iphucwe sona sanikezwa indodana yeNduna esadlula emhlabeni nosekuyiNkosi uXolani Zulu.“Ngenxa yesimo sezokuphepha kuphoqelekile ukuba ngisiyeke isikole,” icashunwe kanje iNkosi uMsingaphansi.
Lombango usuholele ekutheni umphakathi uzithole usunezinduna ezimbili.Enye ibekwe uMsingaphansi kanti enye ibekwe uZulu.UMsingaphansi ubezothweswa iziqu namanye amakhosi angu-47 ekuqaleni kwalo nyaka ngoNhlolanja njengoba ebethweswa e-Inkosi Albert Luthuli International Convention Centre i-UKZN ngokubambisana noMnyango kaButhelezi wakwaCogta.Kodwa ngenxa yokusabela isimo sempilo yakhe esengozini, kugcine kungafezekanga njengoba eshiye izifundo phakathi.
UMsingaphansi ukhala ngokuthi uphucwe isihlalo sanikezwa uZulu ngoba uyise ayewumngani kaMdlokombane.AboMnyango wakwaCogta bakuchithile okushiwo uMsingaphansi.
Discover more from IBUNDA NEWS
Subscribe to get the latest posts sent to your email.
