Ngu: Sidlabehlezi Gumede
UNgqongqoshe wakwaCogta KwaZulu-Natal uMfundisi Thulasizwe Buthelezi usezwakalise ukudabuka ngemuva kwezigmeko zomlilo ezidlule nemiphefumulo engu-8 esifundazweni.
Le mililo emibili iqubuke ngoMgqibelo kuMasipala waseMdoni nowakwaDukuza.
Lezi zehlakalo ezibuhlungu zishiye ifu elimnyama esifundazweni. UButhelezi usesheshe wathumela izikhulu eziphezulu ezivela eSikhungweni SokuPhathwa Kwezinhlekelele saSifundazwe (PDMC) ukuze ziqhube usizo ziphinde ziseke imindeni ethintekile.
Endaweni yaseNongoloza e-wadi 05 e-Umdoni, kubikwe umlilo oqubuke ngemuva nje kwaphakathi kwamabili. Ukuhlolwa kokulawulwa kwezinhlekelele kuqinisekise ukuthi umlilo uthinte imizi emibili.
Umndeni wakwaCibane ulahlekelwe izihlobo zawo ezimbili ngemuva kokuthi umuzi wawo uhlaselwe umlilo, kanti umndeni wakwaDlamini ulahlekelwe ngumuntu oyedwa esehlakalweni esifanayo kuleyo ndawo.
Imibiko ikhomba ukuthi ikhandlela ebelingagadiwe kungenzeka libe imbangela yalo mlilo.
Ngakolunye uhlangothi, enyakatho, endaweni yaseShaka’s Head kuMasipala waKwaDukuza, omunye umlilo omkhulu udlule nemiphefumulo yabantu abahlanu, bonke okukholakala ukuthi basebancane.
Amaqembu okuhlola izinhlekelele okwamanje asesizeni ahlinzeka ngosizo olungokwengqondo nolwenhlalakahle kanye nokwesekwa komndeni othintekile.
UButhelezi kulindeleke avakashele imindeni ethintekile ayobhonga emswaneni ngeSonto.
Discover more from IBUNDA NEWS
Subscribe to get the latest posts sent to your email.
