Umsubathi odumile uzimisele ngokugila izimanga kwiComrades

Ngu: Mduduzi Mbangayiya

Umsubathi wamabanga amade u-Ayanda Ngcobo we-Xcel Running Club yaseThekwini ukholwa ukuthi sesifikile manje isikhathi sakhe sokungena kubasubathi abathathu abazodla ubhedu kwiComrades Marathon.

Kulandela ukuthi abasubathi abayizigqwele zeComrades Marathon sebehanjelwe yimnyaka yobudala namandla asehlile sisho abanjengo Bongumusa Mthembu onqobe Comrades Marathon amahlandla amathathu, Tete Dijana,Edward Mothobi oseyinqobe kanye, Gift Kelehe noDavid Gatebe.

UNgcobo wakwaMajozi eMsinga  uzoqala ukuzwana amandla nabanye abasubathi abasezingeni eliphezulu kwiTwo Oceans Marathon ezoba eCape Town ngomhlaka 11 Ephreli.

Lomjaho webanga lika 56 km uheha abasubathi abasezingeni eliphezulu nabaqhamuka emazweni amaningi anjengoLesotho, Kenya, Uganda, Ethiopia, Russia nakoZimbabwe ,

UNgcobo useqalile ukujima njengoba eqome ukulifulathela iTheku lapho ehlala khona kodwa uyolanda amandla eMsinga lapho eqale khona ukusubatha emazingeni aphansi.

Lo msubathi useke wanqoba iHarry Gwala Marathon wamela INingizimu Africa ku-100 km waphuma unombolo 2 kuPrince Mangosuthu Marathon,  useke wakhiphisa ngezisu abasubathi abayizigqwele kwiComrades Marathon ngesikhathi eqengqeleza phambili kwiComrades Marathon esuka eMgungundlovu waphelelwa amandla ePinetown.