Unompempe waseNingizimu Afrika kanye nephoyisa u-Akhona Ndzingo ulahlekelwe yimpilo yakhe kabuhlungu ngoLwesithathu ngemuva kokubandakanyeka esigamekweni sokudubula eKhayelitsha, eKapa. UNdzingo, naye obesebenza njengephoyisa, kubikwa ukuthi udutshulwe wabulawa izolo ebusuku eKhayelitsha, eSite B. Unompempe wePSL ubesemsebenzini njengephoyisa ngesikhathi umsolwa emdubula.
Osondelene nalesi sigameko ubalule ukuthi uphuthunyiswe esibhedlela eKhayelitsha nokuyilapho efike washonela khona. U-Akhona ubengomunye wonompempe abancane kunabo bonke be-PSL, waqala ukubonakala eneminyaka engu-26. Ngo-2016 waqokwa njengonompempe bonyaka kuSafa eKapa eneminyaka engu-22 kuphela.
UThulani Njili, ongumengameli weLingelethu Local Football Association, uveze ukuthi ukudlula kukanompempe kuwukulahlekelwa okukhulu – hhayi kubantu baseLingelethu kuphela kodwa eNingizimu Afrika yonke. “Siphatheke kabi ngokushona kuka-Akho, akuthina iLingelethu LFA kuphela esilahlekelwe ngisho neNingizimu Afrika yonke,” kusho uNjili etshela iDiski Times.
“Ubesamncane, kunonompempe abaneminyaka engaphansi kuka-10 abebacija, ungacabanga [ukushaqeka kwethu]. “Ungasho ukuthi bazolahleka, sizokwenza konke okusemandleni ukuqhubeka lapho eshiye khona. Lokhu kulahlekelwa okukhulu kwesifunda sonke.”
Discover more from IBUNDA NEWS
Subscribe to get the latest posts sent to your email.
