Sekuqubuke iCholera eLimpopo kutholakala amadoda amabili aseZimbabwe naleligciwane

Abesilisa ababili beZimbabwe abakade bevakashele ezweni labo emkhosini wokuvala umnyaka batholakale nesifo sohudo ngemva kokubuyela eNingizimu Afrika. Njengamanje balashwa eMusina naseHellen Franz Hospital esifundazweni saseLimpopo. UMnyango wezeMpilo eLimpopo uqinisekise izigameko ezimbili zekholera ngoMsombuluko, Januwari 15, 2024. Okhulumela uMnyango, uThilivhali Muavha, uthe iziguli ezimbili, ezineminyaka engu-43 no-27 ubudala, zikhombise izimpawu zesifo sohudo ngesikhathi zivakashele ezikhungweni zezempilo.

“Icholera yisifo esithathelanayo futhi esingase sibeke ukuphila engozini, esibangelwa igciwane iVibrio cholerae. Izimpawu ezivame kakhulu zihlanganisa isifo sohudo esinzima, ukuhlanza, nokuphelelwa amanzi emzimbeni. Uma iyekwa ingalashwa ikholera ingadala izinkinga ezinkulu ngisho nokufa imbala,” kusho uMuavha.

Uthe abezempilo ezibhedlela ezimbili bathathe izinyathelo ezisheshayo zokuqinisekisa ukuthi iziguli ziyamukelwa futhi zelashwa ngokuhambisana nemigomo ebekiwe. “Amathimba ethu ezokwelapha asiqaphe ngeso lokhozi isimo sabo futhi ahlinzeka ngosizo lwezokwelapha oludingekayo ukuze kube lula ukululama kwabo,” esho.

UMuavha uphinde wanxusa umphakathi ukuthi uziphathe ngendlela ehlanzekile, njengoba ikholera itheleleka ngokudla namanzi angcolile. “Ngakho-ke, kubalulekile ukuba abantu bazijwayeze ukuhlanzeka, njengokugeza izandla njalo ngensipho namanzi ahlanzekile, ikakhulukazi ngaphambi kokudla noma ukulungisa ukudla,” esho.

Uqhube wathi umnyango usebenzisana kakhulu neNational Institute for Communicable Diseases (NICD) nezinye izinhlaka ezithintekayo ukuze kunqandwe ukubhebhetheka kwalesi sifo nokuqapha isimo. Ngokwe-World Health Organization (WHO), ikholera idlangile emazweni amaningi ase-Afrika, e-Asia naseLatin America. Lesi sifo singadala ukubheduka kwezifo ezindaweni lapho indle ingahambi khona kahle, ukungabibikho kwamanzi okuphuza aphephile, nokuminyana kwabantu. I-WHO ilinganisela ukuthi bangu-1.3 million kuya ku-4 million abantu ababulawa isifo sohudo kanye nokufa kwabantu abangu-21 000 kuya ku-143,000 emhlabeni wonke minyaka yonke.