Amaphoyisa amane aboshelwe icala lokubulala e-Eastern Cape

I-Independent Police Investigative Directorate (IPID) isikuqinisekisile ukuboshwa kwamaphoyisa amane ePublic Order Policing (Pop) ngecala lokubulala isakhamuzi eCradock, e-Eastern Cape. Ngokusho kokhulumela i-IPID uPhaladi Shuping, la maphoyisa abhekene namacala okuthumba nelokushaya ngenhloso yokulimaza. UShuping uthe kusolakala ukuthi la maphoyisa azingela umufi obekusolakala ukuthi ubegebenga omunye wawo, amyisa ebhilidini iPop lapho afike amshaya khona.

“Kusolakala ukuthi elinye lamaphoyisa lidubule umufi. Kuthiwa bamshiye equlekile ngesikhathi bephuma emsebenzini, watholwa ngamaphoyisa akwenye i-shift, abika ngokufa esitokisini, okuphenywa ngabe-IPID,” kusho uShuping. Uthe amaphoyisa azovela eNkantolo yeMantshi yaseCradock ngoLwesihlanu, 19 January, ukuze afake isicelo sebheyili.

Khonamanjalo, kwesinye isigameko, iphoyisa lomgwaqo lisole amaphoyisa aseDaouglasdale Police Station, eGoli, ngokunqaba ukubhukha izimpahla ezitholiwe. Iphoyisa lomgwaqo lithe lona nozakwabo babophe abasolwa abahlanu ngecala lokweba, base beyisa umbukiso nabasolwa esiteshini samaphoyisa, nalapho lanqatshelwa khona ukubhukha lezompahla.

Kwi-video esabalale ezinkundleni zokuxhumana, iphoyisa lomgwaqo libonakala lizwakalisa ukudinwa kwalo lisola amaphoyisa ngenkohlakalo. Nokho uphiko lwamaphoyisa iSouth African Police Service (SAPS) lusivikele isiteshi samaphoyisa sathi silandele imigudu efanele. “Amaphoyisa akwa-SAPS angathanda ukukucacisa ukuthi isiteshi samaphoyisa asizange senqabe ukubhuka lezimpahla, kodwa sacele iphoyisa lomgwaqo ukuthi lilandele imigudu nemigudu efanele njengokusho komthetho,” kusho okhulumela iSAPS uBrigadier Vishnu Naidoo.

Uthe iphoyisa lomgwaqo lilulekwe ukuthi liwuyise esiteshini samaphoyisa esithintekayo lapho okwenzeke khona ubugebengu, noma liwuyise esiteshini samaphoyisa esiseduze liwuyise lapho kwenzeka khona ubugebengu. UNaidoo uthe iSAPS izithathela phezulu izinsolo zenkohlakalo, wabe esenxusa noma ngubani onobufakazi bokuthi amaphoyisa enze okubi ukuthi abikele i-IPID noma ophikweni olulwa nenkohlakalo kwaSAPS.