U-Eskom uqinisekise ukuthi uNdunankulu waseGauteng waqamba amanga ngesikweletu esichithiwe

Inkampani ephehla ugesi u-Eskom isikuqinisekisile ukuthi ayikaze ilungise ukucishwa kwezikweletu zikagesi. Isitatimende sika-Eskom, siza ngemuva kwezinsuku ezimbalwa uNdunankulu waseGauteng kanye noSihlalo we-ANC eGauteng uPanyaza Lesufi besho okuphambene nalokho. ULesufi ugxekwe yizinhlangano zomphakathi kanye okungenani neqembu elilodwa eliphikisayo ekuqaleni kwaleli sonto ngemuva kokuvela kwevidiyo etshela ikamelo eligcwele abantu ukuthi “zonke” izikweletu ayezikweleta u-Eskom ngamakhasimende aqondile, okuhlanganisa nomasipala, sezichithiwe.

“Bonke abantu abebekweleta u-Eskom iminyaka…Zonke lezo zikweletu sezisuliwe ngokusemthethweni,” kusho uLesufi. “Sikusukumele lokho [i-ANC]. Siqala ngesileti esisha, sonke.” ULesufi ukucacisile ukuthi imali izakhamuzi ezikweletwa omasipala yinto ehlukile kodwa wathi omasipala bangakwazi ukudlulisa imihlomulo, wathi nezikweletu zabo kwa-Eskom sezisuliwe.

“Siyabakhuthaza omasipala abaphethwe yi-ANC ukuthi benze okufanayo baqede izikweletu zabo bonke abantu abakweletayo,” kusho Lesufi. “Sizimisele ngokunqoba lolu khetho.” Kanti kuphindwe kwafakwa le vidiyo kaLusufi, begcona ngokuthi abantu akufanele bakhokhe izikweletu zabo ezisilile zakwa-Eskom.

Ngokushesha ngemva kokuvela kwe-video, iMyBroadband yabuza u-Eskom ukuthi ngabe kukhona yini ukusulwa kwesikweletu sikagesi, njengoba kusho uLesufi. Esitatimendeni esikhishwe ngoLwesine, u-Eskom ulubeke phansi lolu daba. “Okwamanje u-Eskom awukayicubunguli indaba yokucishwa kwezikweletu,” kusho le nkampani.