Bagqunywe esitokisini abakhipha ingqalasizinda yomgwaqo eKZN

Amadoda amabili aboshwe ngezinsolo zokukhipha othayela abayizivimbelo eceleni komgwaqo ama-guardrail, agcinwe esitokisini ngemuva kokuvela eNkantolo yeMantshi yaKwaDukuza ngoMsombuluko.

La madoda aboshwa ngenyanga ka-August asolwa ngokuba yingxenye yalokho okubizwa ngokuthi “yi-Guardrail Mafia”.

Bekulindeleke ukuthi afake isicelo sebheyili, kodwa icala lihlehliselwe inyanga kaNovember ngemuva kokuba ummeli wawo ecele isikhathi esengeziwe sokuxoxa nawo.

Okhulumela uMnyango wezokuThutha KwaZulu-Natal, uNdabezinhle Sibiya, uthi umnyango uzophikisa ukudedelwa kwawo ngebheyili.

Izikhulu zezokuthutha zithi labo abakhipha izivimbelo emgwaqweni KwaZulu-Natal baholela isifundazwe ophathe njengoba silahlekelwa yizigidi zamarandi, nokuyilapho bebeka izimpilo zabashayeli engcupheni.

Ekhuluma ekuqaleni kwalo nyaka, uSibiya uthe lezi zivimbelo zibaluleke kakhulu ekuvikeleni abashayeli, ikakhulukazi emigwaqweni esezintabeni.