Impahla yasikole itholakale idayiswa esitolo sowokufika

Kutholakale kuthengiswa izinto zokufunda ebezihlelelwe izikole esitolo sowokufika esise-Unit 9, eMahikeng, izinto zokufunda ezazihlelelwe abafundi baseNorth West. Lezi zinto zitholakale ngoLwesithathu, mhla zingama-30 kuMandulo, ngamalungu e-Community Police Forum (CPF) ayegada indawo. Kubizwe amaphoyisa kanye nezikhulu zoMnyango Wezemfundo eNorth West ukuba beze esitolo.

UMnyango ube usuqinisekisa ukuthi lezi zinto zokufunda ngezikahulumeni futhi zazihlelelwe ukuthi zihanjiswe kubafundi. Umnikazi wesitolo uboshwe endaweni yesigameko.

Ngokusho koMnyango Wezemfundo, izinto ezilandelayo zithathiwe esitolo i-Jackpot Supermarket:

• Amaphakethe angama-35 ezinto zokufunda zamabanga 10, 11 no-12

• Amaphakethe angama-39 amabanga 4, 5, 6 no-7

• Amaphakethe angama-23 amabanga 1, 2 no-3

• Amabhuku okubhala (counter books) angama-46

ILungu loMkhandlu oPhethe (MEC) Wezemfundo, uDkt. Desbo Mohono, likugxeke kakhulu ukuthengiswa kwalezi zinto zokufunda, wathi izinto zokufunda zikahulumeni zithengelwa abafundi ngakho-ke akumele zithengiswe. UMnyango uthe uzoqhubeka nokusebenzisana namaphoyisa kanye nezinhlaka zomphakathi ukuze kuvikelwe izinsiza zikahulumeni futhi kuqinisekiswe ukuthi izinto zokusekela abafundi ziya kubafundi ezazihlelelwe bona.