U-Yeye wethulwe njengomqeqeshi omkhulu omusha eBotswana

Iqembu lakwi-Botswana Premier League, iMochudi Centre Chiefs, selethule umqeqeshi waseNingizimu Afrika uReneilwe Letsholonyane njengomqeqeshi walo omkhulu omusha.

Lo mbiko uke wabika ngoLwesine ukuthi u-‘Yeye’ ushiye isikhundla sakhe sokuba umsizi womqeqeshi eqenjini laseZimbabwe i-FC Platinum, lapho ayebambisene khona noThabo Senong, nokuthi wayezothatha isikhundla sokuba ngumqeqeshi omkhulu eBotswana.

I-Chiefs, eyaziwa nangokuthi i-Magosi noma i-Maaparankwe, imemezele ngoLwesihlanu ntambama ukuthi iqoke le nganekwane ye-Bafana Bafana ukuba ibe ngumuntu omusha ophethe iqembu.

Leli qembu elake lawina iligi yaseBotswana izikhathi ezine lizobe lithembele kulenkakha yomdlali owayedlalela iqembu le-Kaizer Chiefs, ukuze liqede isomiso seminyaka engu-12 (kusukela ngo-2014/15) lingasinuki isicoco seligi futhi libuyisele iqembu ezinsukwini zalo zokuwina izindebe. Leli qembu elizinze eGaborone okwamanje lisesikhundleni sesikhombisa ngamaphuzu amane emidlalweni emithathu, njengoba iligi yase-Botswana ilokhu ibuswa yi-Jwaneng Galaxy ne-Gaborone United kuleminyaka edlule.

ULetsholonyane ubuyela eBotswana ngemuva kokuqeqesha i-Matebele FC ngoJuni, lapho abe nesikhathi esimpumelelo khona, njengoba ebesize ukuba bagcine indawo yabo esigabeni esiphezulu futhi ephinde waqokwa njengomunye wabaqeqeshi abangase bathole indondo yoMqeqeshi Wonyaka.