Umphathi weqembu, AmaZulu FC, uSandile Zungu, uhlulwe okhethweni lobumengameli be-SAFA ngemuva kokwehlulwa uDanny Jordaan engqungqutheleni yokukhetha ubuholi bale nhlangano enkulu ebibanjelwe eVodacom World eMidrand ngoMgqibelo.
UJordaan uphinde wakhethwa njengomengameli we-SAFA, ethola amavoti angu-157, kanti uZungu uthole amavoti angu-82 kwangu-379 wonke avotiwe.

Abaphathi be-PSL, okubalwa kubo u-Irvin Khoza noKaizer Motaung, bebephakathi kwabebekhona ukuzobona ukhetho, kanti ubuholi bukhona njengamalungu akhethekile e-SAFA.

Amahlebezi amaingi abethi vele i-PSL ibifisa ukuthi isimo siqhubeke njengoba sinjalo, okusolakala ukuthi ibisekela ukuphinde kukhethwe uJordaan. Nokho, njengoba ukhetho lwenziwe ngendlela yokuvota ngasese, akunakwenzeka ukwazi ukuthi izithunywa ngazinye, okubalwa kuzo nezivela kwi-PSL, zivote kanjani.