Kuboshwe usomabhizinisi osondelene noShadrack Sibiya

Amaphoyisa abophe uStuart James Scharnick, ongusomabhizinisi futhi ungumuntu osondelene neSekela likaKhomishana wamaPhoyisa kaZwelonke omisiwe uShadrack Sibiya, ngemuva kokuba intatheli ebika ngeKhomishini yoPhenyo yakwaMadlanga ifake amacala okwesatshiswa uScharnick.

UScharnick uvele wabhekana ngqo nentatheli ngesikhathi sokulalelwa kobufakazi eKhomishini ngemuva kokuba le ntatheli imqophe ngesikhathi sekhefu letiye.

Intatheli yephephandaba iSowetan uHerman Moloi itshela IBUNDA IZINDABA ZESIZWE ukuthi uScharnick uvele weza kuye ngesikhathi sekhefu letiye eKhomishini, ngenkathi eqopha ividiyo yakhe, wabe esemsabisa; lokhu kwenza uMoloi avule icala lokwesabisa.

“Uvele weza kimi wabe esethi ngiqophile amavidiyo ngawafaka ezinkundleni zokuxhumana’. Mina ngathi izolo angikuqophanga nhlobo, ngicela angikhombise leyo vidiyo othi ngiyithathe izolo, wabe esethi: ‘akanayo ifoni yakhe manje’. Indlela akhuluma ngayo ibinokusabisa okukhulu ngoba wayengikhomba ngomunwe, ethi uma ngifuna ukukhuluma kanjalo kufanele ngiphume ngaphandle — asazi ukuthi kwakuzokwenzekani ngaphandle — kodwa indlela akhuluma ngayo yayisabisa kakhulu, yingakho nginqume ukuvula icala lobugebengu.”