I-SAFA isiqoke uMosimane kwesikaBroos

I-National Executive Committee yenhlangano elawula ibhola lezinyawo i-SAFA, isivumelene ngokuthi ikhetha uPitso Mosimane njengomqeqeshi olandelayo weBafana Bafana ozongena esikhundleni sikaHugo Broos.

Isitatimende se-SAFA sicaphune umongameli wenhlangano, uDanny Jordaan, ethi: “I-NEC ivumelene nokuqokwa komqeqeshi uPitso eqenjini iBafana Bafana, kodwa kusenemininingwane ethile okumele iqedelwe. “Sizokwenza isimemezelo esisemthethweni ngalo mqeqeshi ngesonto elizayo.”

U-Broos, oneminyaka engu-74, ushiye isikhundla sokuba ngumqeqeshi omkhulu weBafana Bafana ngomhlaka-31 Julayi ngemuva kweminyaka engaphezu kwemihlanu ephethe.

Lo mqeqeshi waseBelgium waholela iNingizimu Afrika endaweni yesithathu emqhudelwaneni we-Africa Cup of Nations (AFCON) ka-2023 – owawubanjelwe e-Ivory Coast ekuqaleni kuka-2024 – kanye nasesigabeni samaqembu angu-32 kwiNdebe Yomhlaba ka-2026.

U-Mosimane wake wabangumsizi kaCarlos Alberto Parreira ngesikhathi iBafana ibambe iNdebe Yomhlaba ka-2010, lapho iqembu laphuma khona kulomqhudelwano ngemuva kokuzikhandla kakhulu esigabeni samaqembu.

UMosimane wabe esekhushulelwa esikhundleni sokuba ngumqeqeshi omkhulu kodwa waba nesikhathi esingaphumelelanga, okwaphetha ngokuxoshwa kwakhe ngo-2012.

Njengamanje eneminyaka engu-62, u-Mosimane uzibonakalise njengomqeqeshi onekhono ngokuwina izicoco ezintathu ze-CAF Champions League – eyodwa neMamelodi Sundowns kanti ezimbili ne-Al Ahly yaseGibhithe, okuyiqembu lakhe lokuqala kulawo amaningi awaqeqeshile eMiddle East.

U-Mosimane uqinisekise kwabezindaba ngemuva kokwethulwa kwencwadi yakhe yokuqeqesha ibhola lentsha ngoJulayi, ukuthi uvulelekile ukwamukela amathuba omsebenzi.