Uncoma amagalelo eSundowns ngeBafana ku-Afcon

Owayengumdlali weBafana Bafana neKaizer Chiefs uReneilwe “Yeye” Letsholonyane usebongele abadlali beMamelodi Sundowns ngeqhaza labo elibalulekile empumelelweni eyisimangaliso yeqembu laseNingizimu Afrika ku-Africa Cup of Nations ka-2023. ULetsholonyane, osalandela amabheji akhe okuqeqesha ngemuva kokushiya isikhundla sakhe njengomqeqeshi weDDC kuMaZulu, uthe isipiliyoni kanye nezinga labadlali beSundowns kunikeza iBafana ithuba lokudlula izimbangi zayo.

INingizimu Afrika inenebule iMorocco ngo 2-0 ku-last 16 ngoLwesibili, yakhipha iqembu elikleliswe phezulu e-Afrika njengoba izophinde ibhekane neCape Verde kuma-quarter-final ngoMgqibelo. “Kuyasiza ukuthi amaqembu ethu adlale kuleyo miqhudelwano ngoba manje sekuyathela izithelo ku-Afcon,” kusho uLetsholonyane kwiGame On emsakazweni i-Radio2000, ngesikhathi ekhuluma ngokubamba iqhaza kweSundowns kuCAF Champions League.

“Ukuba nabadlali beSundowns enkundleni kusinika ithuba lokudlula amanye amaqembu. Zisisiza ukuthi silawule imizwa yabanye abadlali, zisisiza ukuthi silawule umdlalo kakhulu. “Isipiliyoni sokuhlehlisa imidlalo uma ishesha kakhulu. Isipiliyoni sikaTeboho Mokoena, ukubeka unyawo ebholeni uma lishesha kakhulu, kuvumela abantu ukuthi bakhululeke, umdlalo wehlise ijubane uma kufanele ngakho zibaluleke kakhulu.”

IBafana inabadlali abangu-10 beSundowns eqenjini layo, okuhlanganisa ukaputeni uRonwen Williams, umdlali wasemuva uRushine de Reuck, umdlali wasesiswini uThemba Zwane nomgadli uPercy Tau. ULetsholonyane, owadlala imidlalo engu-54 eqenjini lesizwe, uthe uyaziqhenya ngendlela iBafana edlale ngayo futhi uyinxuse ukuthi iphuphe ngokufinyelela kowamanqamu.

“Ngijabule kakhulu ngabafana, basenze saziqhenya. Bakhombise isimilo, bakhombisa ukuthi bayafuna ukuba khona, bakhombise ukuthi bangaqhudelana nezihlabani zase-Afrika, kumele baqhubeke nokuphupha, baqhubeke bekholelwa ukuthi bangakwazi ukuhamba yonke indlela” usho kanje.