Oklebe bafuna imenenja yaseMugg & Bean eyebe izizumbulu

Uphiko loKlebe, seluphume umkhankaso wokuthungatha umlisa waseZimbabwe, u-Amos Tineyi Kampinya, 44, obeyimenenja yaseMugg & Bean eKruger National Park, ngokweba u-R900,000 eMpumalanga. Icala lenzeke ngoJulayi 2022 eKruger National Park eMpumalanga, ngokusho kokhulumela oKlebe esifundazweni uCaptain Dineo Lucy Sekgotodi.

Kuthiwa uKampyinya usebenze njengemenenja endaweni yokudlela i-Kruger National Park’s Mugg & Bean ngoJulayi 2022. “Kusolwa ukuthi uKampyinya webe imali yenkampani elinganiselwa ku-R897,229 wanyamalala. Ufunwe ekhelini abekade ehlala kulo, eKarino Flats ngaseMbombela wangatholakala,” kusho uSekgotodi.

Khonamanjalo, uMajor General Nicholas Gerber, oyinhloko yoKlebe esifundazweni eMpumalanga, usecele uKampinya ukuthi azinikele emaphoyiseni. UGerber unxuse umphakathi ukuthi ushayele umphenyi wecala, uCaptain Mandla Mphephethe, ku-071 481 3295 uma kukhona abanolwazi mayelana nokuthi ukuphi uKampinya. OKlebe baveze ukuthi yonke imininingwane enikezwe amaphoyisa izogcinwa iyimfihlo.