Abanikazi bezitolo bakwamanye amazwe babhekene nezinkinga e-Dunnottar

I-Dunnottar, idolobha elincane e-Ekurhuleni, eseliphenduke isizinda sokushuba kwesimo nodlame phakathi kwezakhamuzi zendawo kanye nabanikazi bezitolo bakwamanye amazwe. Leli dolobha lisanda kubona kutheleka kwabantu baseSomalia nasePakistan abavule izitolo kule ndawo, ngemuva kokuxoshwa kwamanye amalokishi aseGauteng ngenxa yengozi edalwe yizimpahla zabo zomkokotelo neziphelelwe yisikhathi.

Abantu bakuleli abeneme ngokuba khona kwabanikazi bezitolo bokufika, babasola ngokudayisa ukudla osekuphelelwe yisikhathi, ukwehliswa kwentengo nokuthatha indawo encane ekhona. Iqulu lezakhamizi libambe umbhikisho, lavala imigwaqo ngamathayi avuthayo namatshe, lifuna ukuba abanikazi bezitolo bokufika baphume edolobheni ngokushesha kubika iScrollaAfrica. Isimo sishube ngesikhathi kuqubuka ingxabano phakathi kwababhikishi nabanikazi bezitolo, bezama ukuvikela amabhizinisi abo.

Izinhlangothi zombili zajikijelana ngamatshe nezinhlamba, nokuholele ekutheni amaphoyisa angenelele ngezinhlamvu zenjoloba nesisi esikhalisa unyembezi. Amaphoyisa akwazile ukuletha ukuthula, kodwa isimo sahlala sishubile futhi siguquguquka. Omunye wababhikishi, uZandisile Thukwane, uthe umphakathi ubumbene ekunqabeleni abanikazi bezitolo bokufika. Uthe babonile ukuthi baxoshwa kanjani kwamanye amalokishi ngenxa yemikhuba yabo yokuhweba ngendlela engafanele, wathi abafuni ukubhekana nezinkinga ezifanayo.

“Asibafuni, sifuna bahambe namuhla, futhi uma benqaba ukuhamba namhlanje sizophoqeleka ukuthi sizibambele umthetho ngezandla,” kuxwayisa yena. Omunye umbhikishi, uMapule Tshoene, uthe uzizwa engaphephile kusukela abanikazi bezitolo bokufika bangena edolobheni. Uthe babelwela indawo, futhi bebeka izimpilo zabantu bendawo engcupheni. “AbaseSomalia nabasePakistan manje balwela indawo ngokulwela indawo elinganiselwe, okubeka izimpilo zethu engcupheni,” kusho yena.

Kodwa-ke, umnikazi wesitolo waseSomalia, u-Axada Jama, uthe bebekhonjwa indlela abantu bendawo, abadinwe wuhulumeni wabo. Uthe banazo izincwadi ezisemthethweni zokuba sezweni nokuthi baqhube amabhizinisi abo, akukho mthetho abawephuli. “Abantu baseNingizimu Afrika bacikwa wukuthi uhulumeni wabo akazifezi izethembiso zabo kodwa esikhundleni sokuthi baveze izikhalo zabo kubo, babheke thina. Sithobela umthetho futhi sinezimvume namaphasipoti okuba sezweni futhi siqhube amabhizinisi ethu. Siyavuma abanye bephula umthetho; kumele baboshwe badingiswe,” usho kanje.

Okhulumela amaphoyisa aseGauteng uColonel Dimakatso Nevhuhulwi uthe akukho kulimala, umonakalo noma ukuboshwa kwabantu ababikiwe ngesikhathi sesigameko. Uthe amaphoyisa namaphoyisa kamasipala asiqaphe ngelokhozi isimo, wanxusa izinhlangothi ukuthi zixazulule ukungezwani kwazo ngokuthula.

“Uphiko lwamaphoyisa akwaSaps kanye ne-EMPD (Ekurhuleni Metropolitan Municipality Police Department) Public Order Policing Units baphansi phezulu baqaphe isimo. Sinxusa umphakathi nabanikazi bezitolo ukuthi ugweme udlame futhi uxoxisane ukuze kutholwe isixazululo esihlala njalo,” kusho yena.