Owokufika ugwetshwe iminyaka eyi8 kwelokweba imoto nokwephula umthetho wabokufika

Owesilisa waseZimbabwe oweba imoto eGauteng wabanjwa eLimpopo ugwetshwe iminyaka eyisishiyagalombili ebhadla ejele yiNkantolo yesiFunda yaseMokopane ngoLwesihlanu. UCosmos Ndou, 36, ulivumile icala lokutholakala nemoto eyebiwe kanye nokwephula i-Immigration Act. Uvumile ukuthi weba iToyota Fortuner yethusi endaweni yamaphoyisa eBrooklyn ngomhlaka-16 Septhemba 2023 wayiyisa eLimpopo.

Waboshwa ngomhlaka-18 Septhemba 2023, ngemuva kokuthi inkampani yomkhondo yazise inkampani yonogada eMookgophong ukuthi iqaphe imoto eyebiwe. Inkampani yonogada imise imoto ngaku-R101 North yase itshela uNdou ukuthi imoto kubikwe ukuthi yebiwe. Amaphoyisa afika ngokushesha amvalela uNdou. Icala liphenywe uSergeant Lesiba Teffo weModimolle Vehicle Crime Investigation Unit (VCIU), owethule ubufakazi obumatanisa uNdou nokweba kanye nokuphulwa komthetho wabokufika.

UNdou ugwetshwe iminyaka eyisithupha ebhadla ejele ngokutholakala nemoto eyebiwe kanye neminyaka emibili ebhadla ejele ngokwephula i-Immigration Act. Izigwebo uzozidonsa kanye kanye, okusho ukuthi uNdou uzohlala iminyaka eyisithupha ejele. UKhomishana wamaPhoyisa esiFundazweni eLimpopo, uLieutenant General Thembi Hadebe, uncome umsebenzi we-VCIU kanye nenkampani yonogada ngokuthola imoto eyebiwe nokubamba umsolwa.

Uphinde waxwayisa izigebengu ngokuthi amaphoyisa ngeke abekezelele ukwebiwa noma izenzo ezingekho emthethweni esifundazweni. “Sizimisele ukwenza iLimpopo ibe yindawo ephephile nevikelekile yabo bonke abantu bethu kanye nezivakashi. Ngeke sivumele muntu ukuthi abukele phansi umthetho nobukhosi bezwe lethu. Sizoqhubeka nokusebenzisana nozakwethu ezinkampanini ezizimele kanye nomphakathi ukulandelela kuboshwe labo abenza ubugebengu babhekane nengalo yomthetho,” usho kanje.