I-KZN ihlaselwe yigagasi elisha lobugebengu

I-KZN ihlaselwe yigagasi elisha lobugebengu olubandakanya abokufika kanye nemilutha yezidakamizwa edume ngokuthi “amaphara”. Sekuqoshwe umkhuba omusha KwaZulu-Natal (KZN), lapho abantu bangaphandle abangenazo izincwadi zokuba kulelizwe kanye namaphara (abadla izidakamizwa abangenamakhaya) bebuthwa ngamaqembu obugebengu kanye nokudayiswa kwezidakamizwa ukuba babasenzise njengezinkabi kanye noshaya sibhamu.

Lokhu sekudale ukukhathazeka okukhulu phakathi kophiko lwezobunhloli emaphoyiseni eSouth African Police Service (SAPS), abathi lokhu kwenza kube nzima ukuthungatha nokubopha abenzi bokubulala kanye nokushushumbisa izidakamizwa.

Ngokusho kwamaphoyisa aphezulu akhulume neSunday World kodwa angathandanga ukudalulwa, izinhlangano zobugebengu zixhaphaza abantu bokufika kanye namaphara, abazimisele ukwenza noma yini ukuze bathole imali noma izidakamizwa. Ngokuvamile banikezwa izibhamu, izimoto, neziyalezo zokubulala noma ukudiliva, bese bekhokhelwa imali encane noma banikezwe umthamo wezidakamizwa.