Isihlabani seGqom uBabes Wodumo ogama lakhe langempela uBongekile Simelane, usolwa ngokuhluleka ukukhokhela umculi waso, uPearl Mhlongo (22) wePearlisiwe Make-Up kanye neSkincare yaseThekwini u-R1 200 ngomsebenzi awenza ngo-2021. Ingxoxo yakamuva phakathi kukaMhlongo kanye nodadewabo kaBabes Wodumo oyimenenja, uNondumiso Simelane, ethembisa ukukhokha lemali nge-ewallet. “Ngathulwa KuBabes Wodumo ngumngani wakhe okwabe kuyikilayenti lami, ngamenywa umngani wami ukuthi ngize ngizomthambisa ngafika ngathola uBabes Wodumo naye wacela ukuthi ngimenze ubuso.
Ngawenza umsebenzi wangikhokhela ngokheshi,ngaleso sikhathi ngaba yi-make-up artist yakhe, wasengimemela emzini wakhe oseWestville ukuthi ngifike ngizokwenza ubuso bakhe bese engikhokhela ukheshi,”kusho yena. UMhlongo uthe isizathu esenza ukuthi uBabes Wodumo ahluleke ukumkhokhela ngosuku ayemphophotha ngalo yingoba kwakungekho muntu owayezoshayela imoto eya enxanxatheleni yezitolo eseduze.
“UBabes wangimema ukuthi ngifike ngizokwenza ubuso bakhe, ngaya khona ngenza izinto zami ngahamba ngingakhokhelwanga njengoba wayethembise ukukhokha ngakusasa ngoba wayefuna ngibuye ngizokwenza ubuso bakhe futhi,” kusho uMhlongo enanela ngokuthi. ‘Uhlala eqhamuka nezaba. Angifuni udumo noma ngifuna ukumqeda nya kepha engikufunayo yimali yami yesevisi engiyenzile. Sekuphele iminyaka emibili ngithula ngalokhu ngakho angiqondi ukuthi uyehluleka kanjani ukungikhokhela u-R1 200 uma ethola amagigi.
“Angiqondi futhi ngicabanga ukuthi uyasizakala ngoba ngingowesifazane osemusha ozama ukuqhuba ibhizinisi lakhe lokuzicwala. Engikufunayo yimali yami kuphela,” kusho yena. Imizamo yokuthola ukuphawula kukaBabes iphunzile njengoba evale ucingo ngesikhathi ebuzwa ngesikweletu esisikweleta. Umphathi wakhe nodadewabo omdala, uNondumiso, uthe: “U-Babes akayikweleti intokazi kodwa uSthembile (Owayengu-PA) ongasekho uyena okweleta le ntokazi.
Discover more from IBUNDA NEWS
Subscribe to get the latest posts sent to your email.
