Iloli ebelithwele abasebenzi basemapulazini baseZimbabwe abangu-69 ligingqike kwashona izisebenzi ezintathu kwalimala inqwaba eWestern Cape. Uphenyo lokuqala lukhomba ukuthi umshayeli weloli izolo ngezithuba zabo-07:00 ku-Occultdale Road ngase-Philadelphia eWestern Cape uhlulekile ukuyilawula yagingqika nabasebenzi basepulazini okade bengemuva.
Okhulumela amaphoyisa uLt. Col. Malcolm Pojie uthi iloli linabasebenzi bezikhathi ezithile besuka eWellington bayiswa ePhiladelphia ngesikhathi liginqika. Abathathu kubasebenzi bashonile kwathi abangu-58 balimala.
Iloli ebelithwele abasebenzi basemapulazini abangu-69 ligingqike kwashona abasebenzi abathathu kwathi inqwaba yalimala baphuthunyiswa ezibhedlela ezahlukene endaweni ukuze bathole ukwelashwa. Amaphoyisa athi ababili kwabalimele basesimeni esibucayi kanti baphuthunyiswe esibhedlela ngendiza enophephela emhlane.
Abasele balashelwe endaweni yesigameko. Ngokuhamba kosuku kuthiwa abangu-12 balimele kanzima kwathi abangu-55 bathola imihuzukwana. Ngokusho kwabazibonele bakhulume neDie Burger, umgwaqo ubugcwele izikhwama ojosaka, ama-lunch box nezicathulo. UChristene Phyfer, ohlala epulazini eliseduze, ungomunye wabafike kuqala endaweni yesigameko wathi bekugcwele igazi yonke indawo abantu bebekhala ubuhlungu.
Omunye wabasebenzi uthe bavela eZimbabwe, bahlala eWellington futhi basebenza endaweni yokudayisa iwayini ngaphandle Durbanville. Kubuzwa imibuzo ukuthi ngabe abasebenzi bebethuthwe ngaphansi kwezimo eziphephile noma iloli belingagcwele kakhulu. Amaphoyisa athi uphenyo ngale ngozi lusaqhubeka.
About The Author
Discover more from IBUNDA NEWS
Subscribe to get the latest posts sent to your email.
