Abakhwabanisi bakhomba abafake izicelo ekolishi labahlengikazi

Ithimba lezinkundla zokuxhumana eliqondise abangaba abahlengikazi e-Eastern Cape lisaqhubeka nokuhlukumeza iLilitha College of Nursing. Lokhu kulandela ukuthi amaqola kuthiwa avule i-akhawunti ye-Facebook ne-WhatsApp lapho amukela khona abafake izicelo. UMnyango wezeMpilo usukhiphe isexwayiso emphakathini ngalo mkhonyovu wanxusa abafundi ukuthi bangalokothi bangene ogibeni lokukhokha izizumbulu zemali ukuze bathole izikhala.

Okhulumela uMnyango uSizwe Kupelo uthe labo abanesifiso sokwenza izifundo zobuhlengikazi eLilitha College of Nursing, ophiko lwaso olukhulu elise-East London, kumele baqikelele ukuthi bangabi yizisulu zalo mkhonyovu. “Abaqola basuke bebhekise kubantu abasuke bengalindele lutho,” kusho uKupelo.
“Lo mkhonyovu uhlonzwe ngekhasi elingumbombayi leFacebook elakhiwe ngaphansi kwegama lomnyango neqembu likaWhatsApp eliqhutshwa abantu okuthiwa bamele umnyango, elinikeza abafundi abangase bangene mahhala eLilitha Nursing College.”

UKupelo uqhube wanxusa umphakathi ukuthi ungakhokhi imali yezikhundla ezikhangiswa ngumnyango. Uthe abantu kumele bazi ukuthi izikhala zikahulumeni namanye amathuba okuqeqeshwa awadayisi. “Siluleka amalungu omphakathi ukuthi alishaye indiva leli khasi elingumbombayi, futhi siyibonile nenombolo yeselula exhunywe kulo mkhonyovu. “Kumanje uMnyango usebenzisana nezinhlaka zomthetho ukulandela umkhondo walaba abasolwa ngamaqola kanti sithanda ukunxusa umphakathi ukuthi uthinte isiteshi samaphoyisa esiseduze nabo.”