Kushone abayisithupha iloli lishayisa iveni elithwele abasebenzi ku-N3

Kushone abantu abayisithupha ekwinhlekelele yengozini ebandakanya amaloli amabili kanye neveni ethwala impahla,  emgwaqweni u-N3 Toll Route ku-Van Reenen’s Pass, KwaZulu-Natal, ngoLwesibili ntambama.

I-Road Traffic Management Corporation (RTMC) ithe ingozi yenzeke cishe ngezithuba zabo-12:43 emini ngomhla ka-27 kOctober 2026, phakathi kwase-Sand River nase-Pyramids Hotel.

UNgqongqoshe wezokuThutha nokuHlaliswa kwaBantu KwaZulu-Natal, u Siboniso Duma, uthe uthole umbiko ovela kwa-Road Traffic Inspectorate (RTI) esifundazweni, oqinisekisa ukushona kwabantu abayisithupha.

Ngokwemininingwane yokuqala ekhishwe yi-RTMC, iloli elilodwa belibheke eningizimu lilibangise eThekwini, kanti iveni elithwala impahla kanye neloli lesibili bekubheke enyakatho.

Okhulumela i-RTMC, uSimon Zwane, uthe umshayeli weloli ebelibheke eThekwini kubukeka sengathi uhlulekile  ukulawula iloli, washayisana ngqo neveni elithwala impahla, ngaphambi kokuyoshayisa iloli lesibili.

“Iveni ethwala impahla kubikwa ukuthi ibithwele abasebenzi ngemuva.”

Le ngozi iphume nemiphefumulo eyisithupha, kanti i-RTMC isaqhubeka nophenyo lokuthola imbangela yengozi.

UNgqongqoshe uDuma udlulise amazwi enduduzo emindenini yabashonile.

“Sithanda ukudlulisa amazwi  enduduzo  emindenini yabashonile,” kusho yena.