Kutholakale einye isidumbu sowesifazane eTembisa

Kutholakale esinye isidumbu sowesifazane oseminyakeni engama-30 ubudala, odutshulwe wabulawa, endaweni yaseTemong eTembisa namuhla ekuseni.

Lokhu kwenza isibalo sezidumbu zabesifazane abatholakale bebulewe e-Ekurhuleni nasezindaweni eziseduze kuyo ezinyangeni zakamuva sifinyelele ku-12. Amaphoyisa asemsebenzini wokuphenya izimo ezihambisana nalokhu kubulawa. Lokhu kulandela ukutholakala kowesifazane wesishumi nanye izolo eduze komzila wesitimela eStruisbult, eSprings, e-Ekurhuleni, okwandise ukukhathazeka ngochungechunge lokufa kwabantu kule ndawo. Kuze kube manje, amaphoyisa asebophe abasolwa abane mayelana namacala amathathu kulawa.

UMongameli uCyril Ramaphosa uchaze ukubulawa kwabesifazane kwakamuva njengento ehlazisa amadoda aseNingizimu Afrika. “Asikwazi ukuvumela udlame olubhekiswe kwabesifazane ukuthi luchaze ukuthi singobani. Ukuhlukunyezwa, ukudlwengulwa kanye nokubulawa kwabesifazane kuyibala esazwelweni sethu sikazwelonke. Asikwazi ukuthi sithi singumphakathi osuselwe enkululekweni, ekulinganeni kanye nesithunzi somuntu kuyilapho uhhafu wabantu bakuleli uphila ngokwesaba udlame.”

Amaphoyisa asebophe umsolwa mayelana nokunye kwalokhu kubulawa. Akukacaci ukuthi lesi sigameko sokugcina sokubulawa sihlobene yini namanye amacala aphenywayo e-Ekurhuleni.