UJacinta, ucela ukuba kubuyiswe uDkt. Aaron Motsoaledi, eMnyanweni Wezasekhaya

Umholi we-March and March, uJacinta Ngobese Zuma, ucele obala uMongameli Cyril Ramaphosa ukuba abuyisele uDkt. Aaron Motsoaledi eMnyangweni WezaseKhaya (Home Affairs), ekhala ngokuthi wayekulungele kangcono ukubhekana nezinselele zokufuduka kwabantu eNingizimu Afrika.

Wenze lesi sicelo enkundleni yezokuxhumana i-X ngomhlaka-22 Julayi 2026, ethi uMotsoaledi wayenohlelo oluqinile lokubhekana nenkinga yezokufuduka ezweni. U-Ngobese Zuma unxuse uRamaphosa ukuba adlulisele uNgqongqoshe WezaseKhaya wamanje, uLeon Schreiber, eMnyangweni Wezempilo kuyilapho ebuyisela uMotsoaledi eMnyangweni WezaseKhaya.

Uphinde wagxeka uMongameli, ethi akalaleli izakhamuzi ezijwayelekile ezingenamali noma amabhizinisi. Encwadini yakhe, wabhala wathi: “Kodwa njengezakhamuzi sicela kuwe Mnu. Mongameli ukuba UBUYISE UDkt. MOTSOALEDI.”

Lokhu kubhala kuveze impikiswano enkulu ezinkundleni zokuxhumana. Abanye abasebenzisi bezinkundla zokuxhumana basekele u-Ngobese Zuma, bethi uMotsoaledi wayenezinhlelo ezicacile futhi bekungafanele asuswe kuleso sikhundla. Abanye baphikisane nalokho ngokuthi wakhonza njengoNgqongqoshe WezaseKhaya iminyaka ecishe ibe yisihlanu kuyilapho inkinga yokufuduka kwabantu iqhubeka iba yimbi, kanti abanye bancome uLeon Schreiber ngokwenza izinguquko ezinhle.

Le mpikiswano ikhombisa ukuhlukana kwemibono emphakathini mayelana nendlela iNingizimu Afrika ephatha ngayo udaba lokufuduka kwabantu abangenazo izincwadi ezisemthethweni.

Le ngxoxo iphinde ilandele amazwi ashiwo uMotsoaledi ngesikhathi esenguNgqongqoshe WezaseKhaya ngo-2024, lapho acela khona omeya ukuba bahlole izitolo ezincane (ama-spaza shops) futhi wathi abanikazi abangenazo izincwadi ezisemthethweni kufanele baxoshwe ezweni, kanti labo abahlala ngokusemthethweni kufanele babhalise amabhizinisi abo.