ILesotho ifuna iNingizimu Afrika iyinxephezele, iphinde iyeseke kwezomnotho

Ungqongqoshe Wezangaphandle eLesotho, uLimpho Tau, uthi iNingizimu Afrika inesibophezeko sokusiza ukukhipha iLesotho ekuhluphekeni. UTau ukusho lokhu esithangamini nabezindaba eMaseru.

UTau watshela uNgqongqoshe wezoBudlelwane baseNingizimu Afrika kanye nokuBambisana, uRonald Lamola, ngezinto ezomlando ezakha ingcebo yaseNingizimu Afrika, okubalwa ukuqashwa kwabesilisa base-Basotho njengabasebenzi abashibhile ezimayini zaseNingizimu Afrika.

“I-SA inesibopho esiqotho sokubona ukuthi iLesotho bayasizwa ukuhlenga iLesotho ekuhluphekeni kanye nokukhulisa umnotho okudalwa yilo mlando obuhlungu osukela eminyakeni ecishe ibe ngu-200 kusukela kubusa inkosi uMoshoeshoe I.” kusho uTau

Ngokufika kabamhlophe ngeminyaka yawo-1800, abantu baseSotho balahlekelwa indawo enkulu evundile kanye namadlelo abalulekile. Ngemva kokutholakala kwedayimane eKimberley kanye negolide eWitwatersrand ngeminyaka yawo-1880, ukwethulwa kwentela yezindlu ngohulumeni wamakoloni wamaNgisi kwaphoqa amadoda amaningi aseBasotho ukuthi afune imisebenzi ekhokhelwayo ezimayini zaseNingizimu Afrika.