KUDUTSHULWE kwabulawa igoso obekulindeleke linandise emcimbini weNgoma kaZwelonke ngoJuni 27 ePeople’s Park eThekwini. UMnu Xhegu “Sigxabhiya” Njoko (45) waseWeenen, eMkholombi udutshulwe wabulawa ngoLwesibili ebusuku esemzini wakhe.
Indodakazi yakhe endala uNkz Sinaye Njoko uthi kungene abantu badubula uyise esanda kufika ephuma edolobheni. “Ubesanda kufika nje ekhaya samenzela ukudla wahamba wayolala elawini lakhe.
Ngemva kwesikhashana sizwe sekuqhuma isibhamu izikhathi ezimbili, samuzwa ekhala ethi: “Awu Shembe ngafa ngashiya abatwana bami.” Siphume sonke sayobheka sabona umuntu ephuma ebaleka kwaba ukuthula kwakhe kanjalo,” kusho indodakazi.
Umsunguli weNgoma kaZwelonke uMnu Xolani Mcineka uzwakalise okukhulu ukudumala ngalokhu. “Sigqemeke engeqiwa ntwala ngoba into ebiyenziwa uSigxabhiya eMabhida ibishiya wonke umuntu ebambe ongezansi. Ngikhalela iviyo lakhe, sethembe ukuthi abantu abadala bazosondela emasosheni abesina nawo bawaduduze. Sizoqhubeka sisebenze neqembu lakhe yize engasekho yena,” esho.
Discover more from IBUNDA NEWS
Subscribe to get the latest posts sent to your email.
