Obengumholi weqembu le-IFP eMsinga uselaxaze leliqembu, wajoyina iMK Party, kulandela ukuhlulwa kabili okhethweni lohulumeni basekhaya. UBilly Mbokazi ubesephenduke inhlekisa kumalunga eqembu embiza ngesehluleki njengoba ehlulekile wancama ukunqoba ward 15 amahlandla amabili.
UMthombo unyenyezele IBUNDA NEWS ukuthi uMbokazi uhanjiswe yimsebenzi yakhe engaqondile yokudiliza inkece yeqembu ngemilenze, ngoba kade kunguye phela uMbokazi obephatha amabhuku ezimali kuward 15 eMsinga Top.
“Wahamba namabhuku ezimali wayanawo ehostela iJabulani, eGoli nokulapho khona wafike wabhalisa idlanzana lamalungu e-IFP elihlala khona kepha lisuka eMsinga Top Mangabe usihlalo we IFP eMsinga uZamokwakhe Duze ebuza ngamabhuku ezimali wankwankaza uMbokazi. Ngemuva kwalapho waqoqa imithwalo yakhe neqeqebana labalandeli bakhe bayokhonza kwi MK Party.” kuqhuba uMthombo.
Kuzokhumbuleka ukuthi uMbokazi wahlulwa okhethweni lohulumeni basekhaya ngo 2015 ngesikhathi egaqele isikhundla sokuba yikhansela. Ngonyaka ka 2021 uphinde wabuyela ekugaqeleni ukuba yikhansela lapho ubebanga khona no-Doctor Myeza oyikhansela ku-Ward 15 ngemuva kokuguqisa yena uMbokazi.
Ethintwa uMbokazi ngokulaxaza IFP uvele washaya ngamafuphi wathi – ubuholi beqembu le-IFP eMsinga belibaqhatha noMyeza bona bengenayo inkinga.
“Mina ngashiya iqembu le-IFP ngo 2011 ngesikhathi kuqalwa iqembu leNFP, lapho bengiyilungu elingadumile eqenjini le-IFP, kodwa nganxenxwa ngu Khansela Shelembe ukuthi sijoyine leliqembu leNFP. Ngempela mina namanye amalungu eqenjini le-IFP sajoyina. Ngabuyiswa ngu Doctor Myeza ukuthi ngijoyine leliqembu le-IFP, nami ngempela ngabuyela emuva ngafongqa isigqoko kubaholi bangemukela.” kusho uMbokazi.
“Into engayithandi ekade yenziwa ngabaholi beqembu le-IFP eMsinga, ukuthatha umsebenzi wami bawunike uMyeza, lokho bekuqhatha amadlozi emsamo.
“Kodwa wakubonaphi ukuthi umuntu ethethe elinye idlozi lakomunye umuzi enekubo?” kuqhuba uMbokazi.
“Ngizoyijoyina noma kunini iMK Party ngoba vele sebeshilo bona, mina nengihamba nabo, angithi uDuze wathi ngisehluleki ngokungayinqobi ward 15?. Wathi singaphuma siye lapho sithanda ukuyokhonza khona” kuqhuba uMbokazi.
Iqembu leMK Party belingakaphawuli ngalezingunquko.
Email: editor@ibunda.co.za
Discover more from IBUNDA NEWS
Subscribe to get the latest posts sent to your email.
