Uhulumeni waseKZN uzongcwaba ababhubhe ezehlakalweni zemililo

Ngu: Sidlabehlezi Gumede

UNgqongqoshe wezokuBusa ngokuBambisana neziNdaba zoMdabu KwaZulu-Natal uMfundisi Thulasizwe Buthelezi usethembise ukuthi bazofaka igxalaba bangcwabe abantu abangu-8, ababhubhe ezehlakalweni ezahlukene zomlilo esifundazweni.

NgeSonto uButhelezi uhole ithimba lakhe beyobhonga emswaneni emindenini elahlekelwe izihlobo zayo eMdoni nakwaDukuza.

Phakathi kwalaba ababhubhile kukhona nezingane ezincane.

Abashonile ngu-Asamkele Somtsewu (19), Solulele Somtsewu (1), Sokhula Somtsewu (1), Sivuyile Noyila (14), Amila Menemene (3), Sanele Cibane (37) no-Lungelo Cibane (30) no-Zamokuhle Dlamini (33).

Yize isizathu salemililo sisaphenywa kodwa uButhelezi uqinisekise ukuthi uhulumeni wenza okuthile ukusekela umndeni kanye nokunciphisa izingozi zesikhathi esizayo.

Usizo oluya emindenini luhlanganisa ukuhambisa izidumbu e-Eastern Cape lapho kufanele khona kanye nokukhokhela izindleko zomngcwabo ukuze kuqinisekiswe ukungcwaba okunesithunzi.

UMEC uphinde wayala i-PDMC ukuthi iqale ukufakwa kwama-smoke detector endaweni ethintekile KwaDukuza ukuze kuthuthukiswe ukuqwashisa kusenesikhathi.

“Ubuhlungu le mindeni edlula kubo abulinganiseki. NjengoHulumeni wesiFundazwe, ngeke siduduze nje kuphela—sizokwenza okuthile,” kusho uButhelezi.