Umholi we-ATM ugxeka uMongameli Ramaphosa kanye namaqembu aphikisayo aphambilini

Umholi we-ATM uVuyo Zungula uzwakalise ukungahambisani nobuholi bukaMengameli Cyril Ramaphosa ngoLwesihlanu, egcizelela isikhathi sokubusa esinezethembiso eziyize ezibhebhethekisa ubugebengu, ukungena kwabantu kwamanye amazwe ngokungemthetho, ububha kanye nokuntuleka kwemisebenzi.

UZungula uyichithile inkulumo kaRamaphosa yasephalamende ngoLwesine wathi “iwumncintiswano wokukhuluma,” egxeka ukuntula kukamengameli izinhlelo eziqinile zokubhekana nokufika kwabantu kuleli ngokungemthetho.

“Kunenkinga yokufika kwabantu kwamanye amazwe ngokungemthetho nokuyinto ebeka engcupheni ukuphepha kwezwe. Maviki wonke sizwa kuthiwa kuboshwe amadoda angamasosha kwamanye amazwe elibangise eNingizimu Afrika. La madoda akubona ababaleki. Amadoda abalekela izimpi noma ushushiso awasoze ashiya amakhosikazi awo nezingane,” kusho uZungula ngesikhathi kuqhubeka inkulumompikiswano yangoLwesihlanu ephalamende ngenkulumo kamengameli.

Usole la madoda angahloliwe ngokuzinza emiphakathini futhi aphethe umnotho waselokishini, uRamaphosa athi uzoweseka.

Phezu kwalokhu kugxekwa, uNgqongqoshe Wezasekhaya, uLeon Schreiber, wethule isabelomali somnyango sika-2024/25 ephalamende kuleli sonto, echaza ngezinhlelo zikahulumeni zokuphatha abokufika.

UZungula uphinde wabhekisa amabombo kumaqembu aphikisayo aseyingxenye yohulumeni wobumbano kuzwelonke (GNU). Ubize lo mfelandawonye ngokuthi “ubudlelwane babazenzisi,” egqamisa ukuphikisa kwabo okwedlule ikhabhinethi evuvukele kuyilapho manje bezuza ekwandeni kwayo.

“Lo mfelandawonye omkhulu awunalutho kubantu. Ubambiswano lwabazenzisi abake baphikisana nekhabhinethi evuvukele ngesikhathi behleli emabhentshini aphikisayo, kodwa njengoba sebeshayelwa amalambu aluhlaza, ukuba nekhabethe elikhulu emlandweni wethu akuseyona indaba,” kugomela uZungula.

IDemocratic Alliance (DA), eyake yagxeka ubukhulu bekhabhinethi ye-ANC, manje isizithola isenkingeni. USihlalo we-DA Federal Council uHelen Zille usanda kuveza ukuthi nakuba iDA iyingxenye yeGNU, ayihambisani nekhabhinethi eyandisiwe.

“Asizange sithathe ngisho ingxenye yethu enhle kwikhabhinethi; awukwazi ukusola iDA enezihlalo eziyisithupha ngekhabhinethi equmbile. Besingazi ngaphambi kwesimemezelo ukuthi ikhabhinethi izoba nkulu kangakanani. Empeleni besilindele ukuthi izokwehla ngosayizi,” kusho uZille engxoxweni abe nayo nabakwa-702.

Njengoba izinkulumo-mpikiswano ziqhubeka, inkulumo kazwelonke mayelana nobuholi, abokufika, kanye nobukhulu bekhabhinethi isalokhu ishubile njengakuqala.