I-ANC ixoshe owayenguNgqongqoshe ngemuva kokuqoma uMK

I-ANC eMpumalanga isixoshe owayenguNgqongqoshe wezokuPhepha koMphakathi, uGabisile Shongwe, kulandela isinqumo sakhe sokujoyina imbangi iMK Party. Isinyathelo sikaShongwe sihlangabezane nezinyathelo ezisheshayo ze-ANC, emsola “ngokubukela phansi ubuqotho benhlangano.”

Encwadini yokuxoshwa, uNobhala we-ANC eMpumalanga, uMnuz Muzi Chirwa, uthe ukuqokwa kukaShongwe njengemenenja yokuqoqwa kwezimali ku-MK Party kuhambisana nokuphulwa kwemithetho yeqembu. “Ikomidi lokuqondisa izigwegwe lesifundazwe (PDC) limthole enecala lokubukela phansi ubuqotho benhlangano ngokujoyina, ukubamba iqhaza, nokweseka imisebenzi yezepolitiki yelinye iqembu,” ifundeka kanjalo incwadi.

UShongwe, nokho, usamile kwelokuthi ukuxoshwa kwakhe “akunangqondo” njengoba wayesevele wayishiya i-ANC ngoJanuwari wayojoyina iMK Party yowayengumengameli uJacob Zuma. Uzwakalise ukuphatheka kabi kwakhe nge-ANC, wathi, “Ngayishiya i-ANC kusukela ngoJanuwari”

UShongwe uqhube wadalula ukuthi wenqabile ukuya esigcawini sokuqondiswa kwezigwegwe ethi akaselona ilungu le-ANC ngakho-ke akakho ngaphansi kwezinhlelo zabo. “Kwakumangaza ngempela ukuthi bathi bangixoshile eqenjini labo kuyilapho bebazi ukuthi ngangivele ngimatasa nemikhankaso nezinhlelo ze-MK Party,” usho kanje.

I-ANC iphinde yamkhipha esikhundleni sokuba ngusihlalo wekomidi lezokuhlaliswa kwabantu, ukubusa ngokubambisana kanye nezindaba zomdabu esiShayamthetho saseMpumalanga.