Owokufika ubanjwe ezama ukuthumba abesifazane ngenhloso yokubadayise e-Europe

Owokufika ubanjwe esikhumulweni sezindiza i-OR Tambo ezama ukuthatha izintokazi ezimbili ahlangane nazo endaweni yokujola aziyise e-Europe. Umsolwa oneminyaka engu-56 ubudala waseJalimane, uJoachim Will, ubhekene necala lokushushumbisa abantu kanye nokukhwabanisa ngemuva kokuboshwa ngecala lokuzama ukuyisa abesifazane ababili baseMadagascar eCroatia besebenzisa amaphepha omkokotelo.

Lokhu kuboshwa kwenzeke ngomhla zingama-30 kuMbasa esikhumulweni sezindiza i-OR Tambo International Airport, kulandela umkhankaso ohlanganyelwe wophiko loKlebe oluphenya ngobugebengu obuhleliwe baseWest Rand, i-Interpol, iCrime Intelligence, kanye namaphoyisa esifundazwe saseGauteng.

Ngokusho kokhulumela oKlebe uColonel Philani Nkwalase, laba besifazane ababili, abaneminyaka engu-32 no-29, baqale babanjwa yiBorder Management Authorities ngo-Ephreli 19 ngesikhathi bezama ukugibela indiza eya eCroatia noWill. Batholakala bephethe amapasi ase-Italy omgunyathi base beboshwa, kodwa babuye badedelwa.

“Kusolakala ukuthi uWill wayeqashe abesifazane ngengosi yokuphola eMadagascar,” kuchaza uNkwalase. Uphinde wachaza ngokuthi uWill kusolakala ukuthi wayehe abesifazane ngokubathembisa ukuqashwa namaholo amahle eCroatia. “Ubenze lula uhambo lwabo lokuya eNingizimu Afrika futhi kubikwa ukuthi wabanikeza amapasi e-Italy omgunyathi ohambweni lwabo olusuka eNingizimu Afrika luya eCroatia.”

UWill uvele eNkantolo yeMantshi yaseKempton Park ngoLwesihlanu kanti uzogqunywa esitokisini kuze kube yilapho kulalelwa khona ibheyili yakhe ngesonto elizayo. Kulindeleke ukuthi abuyele enkantolo ngoMeyi 10 ukuze afake isicelo sebheyili ngokusemthethweni.