Inkosi yezidakamizwa e-KZN isolwa ngokuphatha isiteshi samaphoyisa sonke eVerulam

Esambulweni esishaqisayo sekuvela ukuthi umsolwa osolwa ngokuba yinkosi yezidakamizwa KwaZulu-Natal usezakhele isiko lenkohlakalo esiteshini samaphoyisa eVerulam.

Ngokombiko ohlanganiswe umphenyi we-SAPS u-Detective Warrant Officer Sivan Naidoo, amaphoyisa kubikwa ukuthi abezinhloli ukuze avikele ibhizinisi lika-Anthony Gounden, owaziwa ngelika-“Tatu.”

UNaidoo, oyilungu lophiko oluyisipesheli olulwa nobugebengu, oKlebe, uchaze kabanzi ngenkohlakalo eqhubekayo esiteshini samaphoyisa eVerulam, lapho kusolakala ukuthi amaphoyisa abemanqika ukuphenya amacala athinta uGounden, esaba imiphumela.

UGounden, okuthiwa ufaka ukwesaba emphakathini waseVerulam, usanda kuboshwa ngamacala ahlanganisa ukukhwabanisa, ukuphazamisa ukusebenza kwengalo yomthetho, nokutholakala nezibhamu ezingekho emthethweni.

Ukuboshwa kwalowo okuthiwa ungumthengisi wezidakamizwa, oteketiswa ngelika “Tatu,” kusho intuthuko enkulu ekulweni nobugebengu endaweni yaseVerulam.

Kodwa-ke, amalungu omphakathi, okuhlanganisa nesishoshovu uRohan Soobramoney, azwakalise ukukhathazeka ngezinsongo zokuphepha eziqhubekayo, egomela ngokuthi izinsolo zokusebenzisana kwamaphoyisa nabadayisi bezidakamizwa, kuqede ukwethembana emphakathini.

USoobramoney ugcizelele ukuthi ukubanjwa kukaGounden akukudambisi ngokuphelele ukwesaba, njengoba abanye abantu ababandakanyeka ezenzweni zobugebengu beqhubeka nokusebenza ngaphandle kokujeziswa.

Ukuphoxeka komphakathi ngokugcinwa komthetho kuveza isidingo esiphuthumayo sezinyathelo ezibanzi zokulwa nenkohlakalo nokubuyisela ukwethenjwa komphakathi endaweni yaseVerulam.